ডিব্ৰুগড়: ৰাজ্যৰ পাঁচ সমষ্টিৰ উপ-নিৰ্বাচন শান্তিপূৰ্ণভাৱে সমাপ্ত হ'ল । শাসকীয় দল বিজেপি মিত্ৰজোঁটে ৰাজ্যত অনুষ্ঠিত হোৱা পাঁচ সমষ্টিত জয়লাভ কৰিবলৈ সক্ষম হয় । বিহালী আৰু পুৰ্বে কংগ্ৰেছ দলৰ দখলত থকা চামগুৰিত তীব্ৰ প্ৰতিদ্বন্দ্বিতাৰ পাছতো বিজেপিয়ে জয়লাভ কৰিবলৈ সক্ষম হয় । বিজেপি মিত্ৰজোঁটৰ সফলতাৰ পাছতে বিজেপিয়ে অনুষ্ঠিত কৰিছে বিজয় উৎসৱ ।
ৰাজ্যত পুনৰ বিৰোধী দলসমূহ বিপৰ্যস্ত হোৱাৰ মূল কাৰণেই এতিয়া বিৰোধী দলসমূহ একত্ৰিত নোহোৱা বুলি দাবী কৰিছে সকলোৱে । কিয়নো বিজেপিক পৰাভূত কৰিবলৈ বিৰোধী ঐক্য মঞ্চ ৰাজ্যত গঢ়ি উঠিছিল যদিও প্ৰধান বিৰোধী দল কংগ্ৰেছৰ বাবে উপ-নিৰ্বাচনত বিৰোধীয়ে এক হৈ প্ৰতিদ্বন্দ্বিতা কৰিব নোৱাৰিলে ।
ইয়াৰ পাছতে ডিব্ৰুগড়ৰ নামৰূপত প্ৰতিক্ৰিয়া প্ৰকাশ কৰি ৰাজ্যৰ পাঁচ সমষ্টিত বিজেপিৰ সহজ জয়ৰ বাবে কংগ্ৰেছকে দোষাৰোপ কৰিলে অসম জাতীয় পৰিষদৰ সভাপতি লুৰীণজ্যোতি গগৈয়ে ।
উপ-নিৰ্বাচনৰ ফলাফলক লৈ কি কয় লুৰীণজ্যোতি গগৈয়ে :
উপ-নিৰ্বাচনত কংগ্ৰেছ তথা আন আন দলসলমূহে বেয়াকৈ মুখ ঠেকেছা খোৱাৰ পিছতে নামৰূপত উপস্থিত হৈ অসম জাতীয় পৰিষদৰ সভাপতি গৰাকীয়ে কয়, "ৰাজ্যৰ পাঁচ সমষ্টিত বিজেপি মিত্ৰজোঁটৰ প্ৰাৰ্থী জয়লাভ কৰিছে । আমি আগৰ পৰাই কৈ আহিছিলো বিজেপিৰ দৰে শক্তিশালী দলটোক পৰাভূত কৰিবলৈ হ'লে সকলো বিৰোধী একত্ৰিত হ'ব লাগিব । একত্ৰিতভাৱে যুজঁ দিলেহে বিজেপিৰ বিৰুদ্ধে জয়লাভ কৰাৰ সম্ভাৱনা বেছি ।"
তেওঁ লগতে কয়, "উপ-নিৰ্বাচনৰ শেষ মুহূৰ্তলৈকে আমি একত্ৰিত হৈ থকাৰ বাবে চেষ্টা কৰিছিলো । কিন্তু কংগ্ৰেছে বিৰোধীৰ একতাৰ কথা বুজি নোপোৱাৰ বাবেই এনে পৰিৱেশ হৈছে । চামগুৰিত কংগ্ৰেছৰ বেয়া ফলৰ মূল কাৰণেই হ'ল একতা হ'ব নোৱাৰিলো । গৌৰৱ গগৈয়ে বিহালীত ব্যস্ত থকা বাবে চামগুৰিত নিজৰ শক্তি দেখুৱাব নোৱাৰিলে । বিৰোধী একত্রিত হৈ বিজেপিৰ বিৰুদ্ধে ৰণ কৌশল প্ৰস্তুত কৰিলেহে বিজেপিক পৰাজিত কৰা সম্ভৱ ।"
ইয়াৰোপৰি গগৈয়ে কয়,"বিহালীত বিৰোধীৰ ভোট বিভাজনৰ বাবে বিজেপিয়ে জয়লাভ কৰিলে । বিৰোধীৰ একতা কিয় ধৰি ৰাখিব নোৱাৰিলে সেইটো মৌলিক কথা । উপ- নিৰ্বাচনত পাঁচ সমষ্টিত জয় লাভ কৰিলেও কোনেও চৰকাৰ গঠন কৰিব নোৱাৰে । কিন্তু বিৰোধীৰ একতাৰ যি ভেঁটি আমি পঢ়িছিলো তাক জীয়াই ৰখাৰ দৰকাৰ আছিল । কাৰ ভুলৰ বাবে বিৰোধী এক হ'ব নোৱাৰা পৰিৱেশ হ'ল সকলোৱে দেখিছে ।"
