গুৱাহাটী : উপ-নিৰ্বাচনমুখৰ বিহালী সমষ্টিৰ গোৰ্খা আৰু চাহ বাগিচাৰ ভোটাৰক লৈ তুংগত উঠিছে মুখ্যমন্ত্ৰী হিমন্ত বিশ্ব শৰ্মা আৰু লোকসভাৰ উপ-দলপতি তথা কংগ্ৰেছ সাংসদ গৌৰৱ গগৈৰ যুক্তি-তৰ্ক । কিয়নো বিহালী বিধানসভা সমষ্টিত গোৰ্খা আৰু চাহ জনগোষ্ঠীয় ভোটাৰে যিকোনো নিৰ্বাচনত গ্ৰহণ কৰে বিশেষ নিৰ্ণায়ক ভূমিকা ৷
একাধিক ৰাজনৈতিক দলৰ সমীক্ষাৰ তথ্য অনুসৰি, বিহালী বিধানসভা সমষ্টিত মুঠ ৫০ হাজাৰ চাহ জনগোষ্ঠীয় ভোটাৰ আছে । নেপালী লোকৰ ভোটাৰৰ সংখ্যা প্ৰায় ৩০ হাজাৰ ৷
বিহালী বিধানসভা সমষ্টিৰ উপ-নিৰ্বাচনত কংগ্ৰেছ দলৰ মূল দায়িত্বত থকা সাংসদ গৌৰৱ গগৈয়ে শুকুৰবাৰে পুৱাই মুখ্যমন্ত্ৰী হিমন্ত বিশ্ব শৰ্মাৰ প্ৰতি উত্থাপন কৰিছে এলানি প্ৰশ্ন ৷ এক কথাত, বৃহস্পতিবাৰে বিহালীত নিৰ্বাচনী প্ৰচাৰ চলাবলৈ গৈ মুখ্যমন্ত্ৰী হিমন্ত বিশ্ব শৰ্মাই গৌৰৱ গগৈক কৰা সমালোচনাৰ প্ৰত্যুত্তৰ দিয়ে গৌৰৱ গগৈয়ে ।
মুখ্যমন্ত্ৰীৰ প্ৰতি গৌৰৱ গগৈৰ ৫ টা প্ৰশ্ন
শুকুৰবাৰে সামাজিক মাধ্যমযোগে গৌৰৱ গগৈয়ে মুখ্যমন্ত্ৰীক উদ্দেশ্যি ৫ টাকৈ প্ৰশ্ন উত্থাপন কৰি লিখিছে, “মুখ্যমন্ত্ৰী হিমন্ত বিশ্ব শৰ্মা ডাঙৰীয়াৰ পৰা মই নিম্নোক্ত প্ৰশ্নকেইটাৰ উত্তৰ জানিব বিচাৰিছো । যথাক্ৰমে...
১/ বিজেপি দলে শোণিতপুৰ লোকসভা সমষ্টিত ২০২৪ চনৰ নিৰ্বাচনত চাহ জনগোষ্ঠী সম্প্ৰদায়ৰ আৰু গোৰ্খা সম্প্ৰদায়ৰ প্ৰাৰ্থী কিয় দিয়া নাছিল ?
২/ ২০২৪ চনৰ লোকসভা নিৰ্বাচনত বিজেপিয়ে অসমত চাহ জনগোষ্ঠী সম্প্ৰদায়ৰ তিনিজন প্ৰাৰ্থী (কামাখ্যা প্ৰসাদ তাছা, ৰামেশ্বৰ তেলী আৰু পল্লৱ লোচন দাস)ৰ পৰা দুজনলৈ কিয় হ্ৰাস কৰিলে ?
৩/ হিট এণ্ড ৰাণ দুৰ্ঘটনাত মন্ত্ৰী পীযুষ হাজৰীকাৰ কনভয়ৰ খুন্দাত এজন আদিবাসী লোক নিহত হোৱাৰ সময়ত কিয় কোনো গোচৰ পঞ্জীয়ন হোৱা নাছিল ?
৪/ বিজেপিৰ ৰাজ্যিক মন্ত্ৰীসভাত চাহ জনজাতি, আদিবাসী আৰু গোৰ্খা সম্প্ৰদায়ৰ প্ৰতিনিধিত্ব ইমান কম কিয় ?
৫/ অসমৰ আদিবাসী আৰু জনজাতীয় অঞ্চলৰ কিমানখন ব্যক্তিগত চাহ বাগিচা আৰু ৰিজ'ৰ্ট বিজেপি নেতাৰ মালিকানাধীন ?”
বিহালীত গৌৰৱ গগৈ প্ৰসংগত কি কৈছিল মুখ্যমন্ত্ৰীয়ে ?
বৃহস্পতিবাৰে বিহালী সমষ্টিত দুখনকৈ নিৰ্বাচনী সভাৰ উপৰি ৰোড শ্ব’তো অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই ৷ সমান্তৰালভাৱে বিহালী উপ-নিৰ্বাচনী ৰণত কংগ্ৰেছৰ সেনাপতিৰ ভূমিকা পালন কৰা গৌৰৱ গগৈক সমালোচনাৰে থকা-সৰকা কৰে মুখ্যমন্ত্ৰী হিমন্ত বিশ্ব শৰ্মাই ৷
Our Govt has taken several efforts to ensure all round welfare of Bihali and share the fruits of development with the people.
— Himanta Biswa Sarma (@himantabiswa) November 7, 2024
Addressing the people of Bihali https://t.co/1uheAY7RTp
মুখ্যমন্ত্ৰীয়ে কয়, “চাহ বাগিচাৰ এজন প্ৰাৰ্থীক নিৰ্বাচনত পৰাস্ত কৰিবলৈ বিহালীত বাহৰ পাতি বহি লৈছে গৌৰৱ গগৈয়ে । চাহ বাগিচাৰ চৰ্দাৰৰ পুত্ৰ হোৱাৰ বাবেই বিহালীৰ বিজেপিৰ প্ৰাৰ্থী দিগন্ত ঘাটোৱাল বিধায়ক হ’ব নালাগে, মুখ্যমন্ত্ৰীৰ পুত্ৰ হোৱাৰ বাবেই গৌৰৱ গগৈ সাংসদ হ’ব পাৰে ? যোৰহাটৰ পৰা আহি ১৫-২০ দিন বিহালীতেই খোপনি পুতি বহি আছে গৌৰৱ গগৈয়ে ৷ মুখ্যমন্ত্ৰী হোৱাৰো সপোন আছে ৷ ধলাই-চিদলীতো গৈ প্ৰচাৰ চলাওকগৈ গৌৰৱ গগৈয়ে ।"
লগতে মুখ্যমন্ত্ৰীৰ গৌৰৱ গগৈক পোনপটীয়া সমালোচনা, “এজন সাংসদে সকলো বাদ দি ইয়াত বহি থকাৰ কাৰণ কি ? এটাই কাৰণ, তেওঁ চাহ বাগিচাৰ সন্তান বিধায়ক হোৱাটো নিবিচাৰে । ইমানেই ৷ বিহালীত সোণ আছে নে ৰূপ আছে ?”
ऐसा क्यों है कि जब कांग्रेस सत्ता में थी, तब असम में गोरखा समाज के सैकड़ों लोगों को गोली मारकर हत्या कर दी गई थी, और भाजपा की सरकार में ऐसा एक भी हादसा नहीं हुआ?
— Himanta Biswa Sarma (@himantabiswa) November 7, 2024
कांग्रेस गोरखा विरोधी है। @BJP4Assam pic.twitter.com/vGbb0lqpws
গৌৱৰ গগৈয়ে শুকুৰবাৰে পুৱাতে মুখ্যমন্ত্ৰীক তেওঁ কৰা সমালোচনাৰ প্ৰত্যুত্তৰ হিচাপেই সামাজিক মাধ্যমত এৰিলে ওপৰৰ ৫ টা প্ৰশ্ন ৷ এতিয়া মুখ্যমন্ত্ৰীয়ে কি উত্তৰ দিব গৌৰৱ গগৈক ? গৌৰৱৰ প্ৰশ্নলানিয়ে স্পৰ্শ কৰিব পাৰিবনে মুখ্যমন্ত্ৰী আৰু নিৰ্বাচন উন্মুখ বিহালীৰ ভোটাৰক ? সেয়া হ’ব আকৰ্ষণীয় ।
