গুৱাহাটী, ১৮ এপ্ৰিল: গুৱাহাটী উচ্চ ন্যায়ালয়ে বৃহস্পতিবাৰে দিয়া এক গুৰুত্বপূৰ্ণ ৰায়ৰ পিচত সাংসদ নৱ শৰণীয়াৰ ৰাজনৈতিক ভৱিষ্যৎ অনিশ্চিত হৈ পৰিছে । নৱ শৰণীয়াৰ জাতিগত প্ৰমাণ পত্ৰ সন্দৰ্ভত আদালতে আজি দিয়া চূড়ান্ত ৰায়দানত সাংসদগৰাকীৰ জাতিগত প্ৰমাণ পত্ৰ অবৈধ বুলি বিবেচিত হয় । যাৰবাবে এইবাৰ কোকৰাঝাৰৰ পৰা লোকসভা নিৰ্বাচন খেলিব নোৱাৰিব সাংসদ নৱ শৰণীয়াই ৷ গুৱাহাটী উচ্চ ন্যায়ালয়ৰ এজনীয়া খণ্ড বিচৰাপীঠে শৰণীয়াৰ জনজাতিৰ প্ৰমাণ পত্ৰৰ বৈধতা নাকচ কৰে ।
উল্লেখ্য যে, অসম চৰকাৰে গঠন কৰা ৰাজ্যিক পৰ্যায়ৰ জাতিগত নিৰীক্ষণ কমিটীয়ে নৱ কুমাৰ শৰণীয়াৰ জাতিগত প্ৰমাণ পত্ৰখন যোৱা ১২ জানুৱাৰীত বাতিল কৰিছিল । নৱ শৰণীয়াই অসম চৰকাৰৰ এই নিৰ্দেশক প্ৰত্যাহ্বান জনাই উচ্চ ন্যায়ালয়ৰ কাষ চাপিছিল । তাৰ পিছত কমিটীখনেও আদালতৰ কাষ চাপিছিল । পৰৱৰ্তী সময়ত উচ্চ ন্যায়ালয়ে ৰাজ্য চৰকাৰৰ এই নিৰ্দেশত স্থগিতাদেশ দিছিল ।
কিন্তু এই স্থগিতাদেশৰ প্ৰত্যাহ্বান জনাই কমিটীয়ে পুনৰ আদালতত আবেদন কৰে । অৱশেষত যোৱা ৪ এপ্ৰিলত গুৱাহাটী উচ্চ ন্যায়ালয়ৰ খণ্ড বিচাৰপীঠে উচ্চ ন্যায়ালয়ৰ এজনীয়া বিচাৰপীঠৰ পূৰ্বৰ অন্তৱৰ্তীকালীন স্থগিতাদেশৰ ৰায় খাৰিজ কৰিছিল ৷
মন কৰিবলগীয়া যে এই জনজাতি প্ৰমাণ পত্ৰৰ আধাৰতে নৱ কুমাৰ শৰণীয়াই জনজাতিসকলৰ বাবে সংৰক্ষিত ২ নং কোকৰাঝাৰ লোকসভা সমষ্টিৰ পৰা ২০১৪ আৰু ২০২৯ত দুবাৰকৈ নিৰ্বাচনত জয়লাভ কৰি সাংসদ হ'বলৈ সক্ষম হৈছিল ৷ এইবাৰো কোকৰাঝাৰৰ পৰা নিৰ্বাচনত অৱতীৰ্ণ হোৱাৰ বাবে শৰণীয়া সাজু হৈছিল ।
ইফালে শুকুৰবাৰে তৃতীয় পৰ্যায়ৰ নিৰ্বাচনৰ মনোনয়ন দাখিলৰ অন্তিম দিন । গতিকে এনে পৰিস্থিতিত নৱ শৰণীয়াই এইবাৰ কোকৰাঝাৰ সমষ্টিৰ বাবে মনোনয়ন দাখিল কৰিব নোৱাৰিব ।
