গুৱাহাটী, ২৪ জুলাই : অসমৰ বান সমস্যাক দীৰ্ঘদিন ধৰি উপেক্ষা কৰি অহা হৈছে বুলি অৱশেষত অগপই উপলব্ধি কৰিছে ৷ বিষয়টোক লৈ সোমবাৰে কৰা হ’ল বিস্তৃত আলোচনা ৷ অসমৰ বানৰ বাবে পেকেজ ঘোষণা কৰিবলৈ কেন্দ্ৰীয় চৰকাৰক দাবী জনাব বুলি প্ৰস্তাৱ লোৱা হ’ল অগপৰ বৰ্ধিত কাৰ্যনিৰ্বাহক সভাত ৷
বিহাৰৰ বানৰ বাবে যিদৰে শকত পেকেজ কেন্দ্ৰীয় চৰকাৰে আৱন্টন দিছে, সেইদৰে অসমৰ বাবেও ঘোষণা কৰিবলৈ দাবী জনাব অসম চৰকাৰৰ অংশীদাৰ অগপই ৷ বুধবাৰে আমবাৰীৰ মুখ্য কাৰ্যালয়ত অনুষ্ঠিত অসম গণ পৰিষদৰ কাৰ্যনিৰ্বাহক সভাত গ্ৰহণ কৰা হয় এই গুৰুত্বপূৰ্ণ প্ৰস্তাৱ ৷
উল্লেখ্য যে আগন্তুক বিধানসভা উপ-নিৰ্বাচন আৰু পঞ্চায়ত নিৰ্বাচনৰ সন্দৰ্ভত বুধবাৰে অগপৰ মুখ্য কাৰ্যালয়ত বৰ্ধিত কাৰ্যনিৰ্বাহক সভাত আলোচনা কৰা হয় ৷ সভাপতি অতুল বৰা, কাৰ্যকৰী সভাপতি কেশৱ মহন্ত আদিকে ধৰি বহু নেতা-কৰ্মী উপস্থিত থাকে এই কাৰ্যনিৰ্বাহক বৈঠকত ৷ কাৰ্যনিৰ্বাহক বৈঠকখনত আগন্তুক বিধানসভা সমষ্টিৰ উপ-নিৰ্বাচন, পঞ্চায়ত নিৰ্বাচন সন্দৰ্ভত কৰা হয় বিস্তৃত আলোচনা । অগপৰ দুৰ্গসমূহৰ ভিতৰত অন্যতম বঙাইগাঁও সমষ্টিত নিৰ্বাচন খেলাৰ সন্দৰ্ভত মন্তব্য কৰি অগপৰ সভাপতি অতুল বৰাই কয়, ‘‘ বঙাইগাঁৱত ১৯৮৫ চনৰ পৰা অগপই বিজয়ধ্বজা উৰুৱাই আহিছে । এইবাৰো উপ-নিৰ্বাচনত অধিক ভোটত অগপৰ প্ৰাৰ্থী জয়ী হৈ আহিব বুলি আমাৰ বিশ্বাস ৷’’
ইফালে আগন্তুক পঞ্চায়ত নিৰ্বাচনৰ সন্দৰ্ভত মন্তব্য কৰি বৰাই কয় যে পঞ্চায়ত নিৰ্বাচন যিহেতু দলীয় চিহ্নত নহয় সেয়ে এই সন্দৰ্ভত বিজেপিৰ লগতে আলোচনা কৰা হ’ব ৷ আনহাতে ৩১ আগষ্টৰ ভিতৰত উপ-নিৰ্বাচন আৰু পঞ্চায়ত নিৰ্বাচন অনুষ্ঠিত হ'বলগীয়া সমষ্টিসমূহত সাংগঠনিক স্তৰ পূৰ্ণাংগ কৰিবলৈ নিৰ্দেশ দিয়ে কাৰ্যনিৰ্বাহকে ৷ তদুপৰি পঞ্চায়ত নিৰ্বাচনৰ ক্ষেত্ৰত প্ৰাৰ্থী বাচনিৰ ক্ষেত্ৰত সতৰ্ক হ'বলৈ দলীয় কৰ্মীক নিৰ্দেশ দিয়ে কাৰ্যনিৰ্বাহক সভাই ৷
দলৰ ভেটি শক্তিশালী কৰাৰ প্ৰসংগত লোৱা হয় কেতবোৰ গুৰুত্বপূৰ্ণ প্ৰস্তাৱ ৷ সেই অনুসৰি প্ৰতি সপ্তাহতে ভিডিঅ’ কনফাৰেন্সৰ জৰিয়তে দলৰ কৰ্মীসকলৰ সৈতে বাৰ্তালাপ কৰিব নেতৃত্বই ৷ তদুপৰি ১৯, ২০ আৰু ২১ আগষ্টত তিনিদিনীয়াকৈ অগপৰ ৰাজনৈতিক কৰ্মশালা অনুষ্ঠিত হ’ব । তাৰ বাবে এখন সমিতি ইতিমধ্যে গঠন কৰি দিয়া হৈছে । সমান্তৰালভাৱে প্ৰতিটো সমষ্টিত জনসংযোগ বৃদ্ধিৰ বাবে পৰ্যবেক্ষক নিযুক্তি দিয়া হ’ব বুলি সদৰী কৰে অগপৰ সভাপতি অতুল বৰাই ৷ পৰ্যবেক্ষকসকলে গাঁৱে গাঁৱে থাকি ৰাইজৰ সৈতে মত-বিনিময় কৰিব ৷ অসম আন্দোলনৰ সৈনিকসকলৰ লগতে নেতৃস্থানীয় লোকসকলৰ সৈতেও মত বিনিময় কৰিব পৰ্যবেক্ষকসকলে ৷
