গুৱাহাটী, 6 আগষ্ট: আগন্তুক পঞ্চায়ত নিৰ্বাচনত বিজেপিয়ে অকলেই প্ৰতিদ্বন্দ্বিতা আগবঢ়াব বুলি মুখ্যমন্ত্রী হিমন্ত বিশ্ব শৰ্মাই ঘোষণা কৰাৰ পাচতে বিশেষভাৱে তৎপৰ হৈ পৰিছে মিত্রদল অগপ । পাঁচটা সমষ্টিৰ উপ-নিৰ্বাচন আৰু পঞ্চায়ত নিৰ্বাচনৰ পাচতে 2026 ত অনুষ্ঠিত হ'ব বিধানসভা নিৰ্বাচন । অগপই বিজেপিৰে সৈতে মিত্রতাত থাকি শেহতীয়া নিৰ্বাচনত অৱতীৰ্ণ হৈ আহিছে যদিও শেহতীয়াকৈ মুখ্যমন্ত্রীয়ে আগন্তুক পঞ্চায়ত নিৰ্বাচন দলে অকলেই খেলিব বুলি ঘোষণা কৰাৰ পাচতে অগপৰ ভিতৰচ'ৰাত প্ৰতিক্ৰিয়াৰ সৃষ্টি হৈছে ।
মুখ্যমন্ত্রীৰ ঘোষণাৰ পাচতে মঙলবাৰে অগপৰ আমবাৰীস্থিত মুখ্য কাৰ্যালয়ত দলটোৰ ভাতৃ-ভগ্নী সংগঠন অসম কৃষক পৰিষদ, অসম ছাত্ৰ পৰিষদ আৰু অসম মহিলা পৰিষদৰ বৰ্ধিত কাৰ্যনিৰ্বাহক সভা অনুষ্ঠিত হয় । তিনিটাকৈ সংগঠনৰ পৃথকে পৃথকে অনুষ্ঠিত হোৱা বৰ্ধিত কাৰ্যনিৰ্বাহক সভাত দলৰ সভাপতি অতুল বৰা আৰু কাৰ্যকৰী সভাপতি কেশৱ মহন্তৰ লগতে দলীয় শীৰ্ষ নেতৃত্বই অংশগ্ৰহণ কৰে । ৰুদ্ধদ্বাৰ বৈঠকত পাঁচ সমষ্টিৰ উপ-নিৰ্বাচন আৰু পঞ্চায়ত নিৰ্বাচনৰ উপৰি 2026 ৰ বিধানসভা নিৰ্বাচন সন্দৰ্ভত বিতং আলোচনা কৰা হয় । পঞ্চায়ত নিৰ্বাচনত মিত্রদল বিজেপিয়ে অকলে অৱতীৰ্ণ হ'লে অগপৰ স্থিতি তথা ৰণকৌশল কেনে হোৱা উচিত তাক লৈও আলোচনা কৰা হয় ।
অগপৰ কাৰ্যালয়ত অনুষ্ঠিত দলৰ ভাতৃ-ভগ্নী সংগঠনসমূহৰ গুৰুত্বপূৰ্ণ কাৰ্যনিৰ্বাহ বৈঠকত দলীয় নেতৃত্বই কেতবোৰ নিৰ্দেশনাও প্ৰদান কৰে । বৈঠকত সভাপতি অতুল বৰাই বিজেপিয়ে পঞ্চায়ত নিৰ্বাচনত অকলে অৱতীৰ্ণ হ'লে অগপয়ো অকলে নিৰ্বাচন পঞ্চায়ত নিৰ্বাচন খেলিব বুলি সদৰী কৰে ।
মন্ত্ৰী অতুল বৰাই এই সন্দৰ্ভত কয়, "অসমৰ মাটিত অসম গণ পৰিষদ শক্তিশালী হোৱা মানে আঞ্চলিকতাবাদ শক্তিশালী হোৱা । দলৰ সাংগঠনিক ভেঁটি শক্তিশালী কৰাৰ বাবে অধিক ক্ষীপ্ৰতাৰে কাম কৰাৰ সিদ্ধান্ত গ্ৰহণ কৰা হৈছে । আগন্তুক নিৰ্বাচনসমূহক লৈ ভাতৃ-ভগ্নী সংগঠনসমূহো শক্তিশালী কৰিবলৈ চেষ্টা কৰা হৈছে । আগতেও পঞ্চায়ত নিৰ্বাচন আমি অকলে খেলিছিলো । মিত্ৰতাক লৈ অৱশ্যে আমি এতিয়ালৈকে কথা পতা নাই । কিন্তু পঞ্চায়ত নিৰ্বাচনৰ বাবে আমি সাজু । বঙাইগাঁৱত এইবাৰ পূৰ্বতকৈ অধিক ভোটত জিকিম । 25 আগষ্টৰ পৰা সপ্তাহজুৰি সমগ্ৰ ৰাজ্যত অগপৰ বুথ সন্মিলন অনুষ্ঠিত হ'ব । তাৰ পূৰ্বে 19 আগষ্টৰ পৰা তিনিদিনীয়া ৰাজনৈতিক কৰ্মশালা অনুষ্ঠিত হ'ব ।"
গুৱাহাটীৰ কৃত্রিম বানপানীৰ প্ৰসংগত বৰাই কৃত্ৰিম বানৰ বাবে চৰকাৰে কৰিবলগীয়া কাম কৰি আছে বুলি উল্লেখ কৰে ।
আনহাতে অগপৰ কাৰ্যকৰী সভাপতি কেশৱ মহন্তই এই সন্দৰ্ভত কয়, "31 আগষ্টৰ ভিতৰত অগপৰ বহু কাৰ্যসূচী আছে।উপ-নিৰ্বাচনত পাঁচটা সমষ্টিতে অগপই গুৰুত্বপূৰ্ণ ভূমিকা ল'ব । পঞ্চায়ত নিৰ্বাচনৰ বাবে দল সাজু ।"
কৃত্ৰিম বানৰ প্ৰসংগত মহন্তই কয়, "কালি মোৰ ঘৰৰ কাষত নাও চলিছে । পৰৱৰ্তী সময়ত দুৰৱস্থাবোৰ দূৰ কৰিবলৈ চেষ্টা কৰিম ।"
ইফালে বিধায়ক ৰমেন্দ্ৰ নাৰায়ণ কলিতাই সংবাদ মাধ্যমৰ আগত কয়, "দলে লোৱা সিদ্ধান্তসমূহ কাৰ্যকৰী কৰাৰ ক্ষেত্রত দলৰ ভাতৃ-ভগ্নী সংগঠনসমূহৰ যথেষ্ট দায়িত্ব আছে । সেই দায়িত্ব পালনৰ ক্ষেত্রত নিৰ্দেশনা দিয়াৰ বাবে আজিৰ এই বৈঠক । 2026 ৰ বিধানসভা নিৰ্বাচনলৈকে বিজেপিৰে মিত্রতা আছে । আগন্তুক পঞ্চায়ত নিৰ্বাচনত আমি আমাৰ শক্তি প্ৰদৰ্শন কৰিব লাগিব । বিজেপিয়ে পঞ্চায়ত নিৰ্বাচন খেলিলে আমিও অকলে খেলাৰ ব্যৱস্থা গ্ৰহণ কৰিম ।"
