ইণ্টাৰনেচনেল ডেস্ক, ১০ আগষ্ট : গাজাৰ অসামৰিক প্ৰতিৰক্ষা সংস্থাই জনোৱা মতে, শনিবাৰে গাজা চহৰৰ এখন বিদ্যালয়ত ইজৰাইলী আক্ৰমণত কমেও ১০০ জন লোক নিহত হয় । আনহাতে, ইজৰাইলী সামৰিক বাহিনীয়ে কয় যে তেওঁলোকে হামাছৰ এটা নিৰ্দেশ কেন্দ্ৰত আঘাত কৰিছে ।
"মৃত্যুৰ সংখ্যা বৰ্তমান ৯০-১০০ ৰ ভিতৰত । আনহাতে, বহু লোক আহত হৈছে । তিনিটা ইজৰাইলী ৰকেটে বিদ্যালয়খনত আঘাত কৰে । তাত পেলেষ্টাইনী শৰণাৰ্থীসকলে বাস কৰিছিল ।" সংস্থাটোৰ মুখপাত্ৰ মাহমুদ বাচালে সংবাদ প্ৰতিষ্ঠান এ এফ পিক কয় । আনহাতে, গাজাৰ চৰকাৰী সংবাদ মাধ্যমে কৈছে যে এই আক্ৰমণত শতাধিক লোক শ্বহীদ হৈছে ।
বাচালে এই ঘটনাটোক ‘‘এক ভয়ংকৰ গণহত্যা’’ বুলি উল্লেখ কৰে । কিছু মৃতদেহ অগ্নিদগ্ধ হয় । তেওঁ কয়, "শ্বহীদসকলৰ মৃতদেহ উদ্ধাৰ কৰিবলৈ আৰু আহতসকলক উদ্ধাৰ কৰিবলৈ কৰ্মচাৰীসকলে জুই নিয়ন্ত্ৰণ কৰিবলৈ চেষ্টা কৰি আছে ।"
আনহাতে, ইজৰাইলৰ সেনাই শনিবাৰে কয় যে তেওঁলোকে ‘‘আল-তাবা'ইন’’ বিদ্যালয়ত থকা হামাছ কমাণ্ড এণ্ড কণ্ট্ৰোল চেণ্টাৰৰ ভিতৰত সক্ৰিয় হৈ থকা হামাছ সন্ত্ৰাসবাদীক আঘাত কৰে । বৃহস্পতিবাৰে সংস্থাটোৱে কয় যে ইজৰাইলী আক্ৰমণে গাজা চহৰৰ দুখন বিদ্যালয়ত আঘাত কৰে । ইয়াৰ ফলত ১৮ জনৰো অধিক লোক নিহত হয় ।
উল্লেখ্য যে, হামাছৰ ৭ অক্টোবৰৰ ইজৰাইল আক্ৰমণৰ পিচৰে পৰা গাজাত যুদ্ধ আৰম্ভ হয় । ইয়াৰ ফলত ১,১৯৮ জন লোকৰ মৃত্যু হয় । ইয়াৰে বেছিভাগ সাধাৰণ লোক । ইজৰাইলৰ চৰকাৰী পৰিসংখ্যাৰ ওপৰত ভিত্তি কৰি এ এফ পিৰ এক প্ৰতিবেদনত উল্লেখ কৰা হৈছে ।
আনহাতে, পেলেষ্টাইনী সন্ত্ৰাসবাদীয়ে ২৫১ জন লোকক পণবন্দী কৰে । ইয়াৰে ভিতৰত ১১১ গৰাকী এতিয়াও গাজাত বন্দী হৈ আছে । ইফালে ৩৯ গৰাকী লোকৰ মৃত্যু হোৱা বুলি ইজৰাইলী সামৰিক বাহিনীয়ে প্ৰকাশ কৰে । আনহাতে, গাজাত ইজৰাইলৰ প্ৰতিশোধমূলক সামৰিক অভিযানত কমেও ৩৯,৬৯৯ গৰাকী লোক নিহত হৈছে । হামাছ পৰিচালিত অঞ্চলৰ স্বাস্থ্য মন্ত্ৰণালয়ৰ তথ্যত এই কথা প্ৰকাশ । অৱশ্যে ইয়াৰে ভিতৰত অসামৰিক আৰু সন্ত্ৰাসবাদীৰ মৃত্যুৰ সংখ্যা পৃথকে দিয়া হোৱা নাই ।
