স্তন কেন্সাৰৰ তৃতীয় পৰ্যায়ত আছে জনপ্ৰিয় টেলিভিছন তাৰকা হিনা খান ৷ শেহতীয়াকৈ তেওঁৰ অস্ত্ৰোপচাৰ কৰা হৈছিল ৷ ইয়াৰ পিচত তেওঁৰ কেমোথেৰাপি কৰিব লগা হয় ৷ শৰীৰৰ পৰা কেন্সাৰ সম্পূৰ্ণৰূপে নাইকিয়া কৰিবলৈ এইটো অতি প্ৰয়োজনীয় ৷ কিন্তু ইয়াৰ বহু পাৰ্শ্বক্ৰিয়াও আছে ৷
কেমোথেৰাপি কেনেধৰণৰ প্ৰক্ৰিয়া ?
চিকিৎসকৰ মতে, কেমোথেৰাপি ঔষধ এটি বিশেষ যন্ত্ৰৰ সহায়ত বেজীৰে বা বুকু তথা বাহুৰ শিৰাত দিয়া হয় ৷ কিছুমান কেমোথেৰাপি ঔষধ কেপচুল আৰু জেলৰ ৰূপত গ্ৰহণ কৰিব পাৰি ৷ ইয়াৰ পাৰ্শ্বক্ৰিয়া ব্যক্তিভেদে বেলেগ বেলেগ হ’ব পাৰে ৷ আজি জানো আহক কেমোথেৰাপিৰ পাৰ্শ্বক্ৰিয়াসমূহ-
ভাগৰ (Fatigue)
কেমোথেৰাপিৰ বাবে ভাগৰুৱা হোৱাটো সাধাৰণ কথা ৷ এয়া শাৰীৰিক আৰু মানসিক দুয়োটা হ’ব পাৰে ৷ দৈনন্দিন কাম-কাজৰ বাবেও শক্তিৰ অভাৱ অনুভৱ কৰিব পাৰে ৷ এই সময়ছোৱাত পৰ্যাপ্ত জিৰণি লোৱাটো গুৰুত্বপূৰ্ণ ৷
চুলি সৰা (Alopecia)
কেমোথেৰাপিৰ অন্যতম পৰিচিত পাৰ্শ্বক্ৰিয়া হ’ল চুলি সৰা ৷ মূৰৰ চুলি, চেলাউৰি, চকুৰ পতা আৰু শৰীৰৰ চুলিকে ধৰি সকলো ধৰণৰ চুলিত ইয়াৰ প্ৰভাৱ পৰিব পাৰে ৷ কিন্তু এইটো সাময়িক আৰু চিকিৎসা সম্পূৰ্ণ হোৱাৰ পিচত চুলি পুনৰ গজিব পাৰে ৷
বমি আৰু ওকট-পাকট লগা (Nausea and Vomiting)
কিছুমান কেমোথেৰাপি ঔষধে বমি আৰু ওকট-পাকট লগাৰ দৰে সমস্যাৰ সৃষ্টি কৰিব পাৰে ৷ এই পাৰ্শ্বক্ৰিয়াৰ ফলত খাদ্যৰ অভাৱ আৰু ডিহাইড্ৰেচন হ’ব পাৰে ৷ এই লক্ষণসমূহ কম কৰিবলৈ চিকিৎসকে প্ৰায়ে ঔষধ দিয়ে ৷
সংক্ৰমণৰ সম্ভাৱনা বৃদ্ধি (Increased Risk of Infection)
কেমোথেৰাপীয়ে শৰীৰৰ ৰোগ প্ৰতিৰোধ ক্ষমতা দুৰ্বল কৰি সংক্ৰমণৰ সম্ভাৱনা বৃদ্ধি কৰিব পাৰে ৷ গতিকে কেমোথেৰাপিৰ সময়ত এজন ব্যক্তিয়ে বিশেষ সাৱধানতা অৱলম্বন কৰাটো প্ৰয়োজনীয় ৷ সঘনাই হাত ধোৱা, ভিৰ থকা ঠাইৰ পৰা আঁতৰি থকা আৰু কেৱল চিকিৎসকে দিয়া ঔষধহে সেৱন কৰাটো প্ৰয়োজনীয় ৷
নিউৰ’পেথী (Neuropathy)
কিছুমান কেমোথেৰাপি ঔষধে স্নায়ুতন্ত্ৰৰ ক্ষতিসাধন কৰিব পাৰে, যাৰ ফলত হাত-ভৰি অজ্ঞান হৈ পৰা, জিনজিননি, বিষ বা দুৰ্বলতা আদি সমস্যা হ’ব পাৰে ৷ এই লক্ষণসমূহ সাময়িক হ’ব পাৰে, কিন্তু কিছুমান ক্ষেত্ৰত স্থায়ীও হ’ব পাৰে ৷
লগতে পঢ়ক: স্তনৰ কৰ্কট ৰোগ হ’লে মৃত্যুৰ সম্ভাৱনা কিমান বেছি ? জানি লওক চিকিৎসকৰ পৰা - Breast Cancer
