কেৰালাৰ মালাপ্পুৰম জিলাত নিপাহ ভাইৰাছ সংক্ৰমণৰ বাবে এজন ২৪ বছৰীয়া ছাত্ৰৰ মৃত্যু হয়, ইয়াৰ পিছতে ৰাজ্য চৰকাৰে ততাতৈয়াকৈ জাৰি কৰে সতৰ্কবাণী৷ সংক্ৰমণ প্ৰতিৰোধৰ বাবে প্ৰশাসনে বহু গুৰুত্বপূৰ্ণ পদক্ষেপ গ্ৰহণ কৰাৰ লগতে স্থানীয় অঞ্চলসমূহক কণ্টেইনমেণ্ট জ’ন হিচাপে ঘোষণা কৰিছে ৷
সম্প্ৰতি নাগৰিকসকলক মাস্ক পৰিধান কৰি জনবহুল স্থানলৈ নাযাবলৈ আহ্বান জনোৱা হৈছে ৷ ইয়াৰ সমান্তৰালকৈ বিদ্যালয়, মহাবিদ্যালয়, টিউচন চেণ্টাৰ, মাদ্ৰাছা, অংগনবাড়ী, চিনেমা হল আদি বন্ধ কৰি দিয়া হৈছে ৷ অৱশ্যে পুৱা ১০ বজাৰ পৰা সন্ধিয়া ৭ বজালৈ দোকান-বিপনী খোলাৰ অনুমতি দিয়া হৈছে ৷
আপোনালোকক জনাই দিও যে নিপাহ ভাইৰাছ এটা অতি মাৰাত্মক ভাইৰাছ, যাৰ ভয়াৱহতা পূৰ্বেও কেৰালাত দেখা গৈছে ৷ এই ভাইৰাছে মানুহ আৰু জীৱ-জন্তু উভয়কে সংক্ৰমিত কৰিব পাৰে আৰু ইয়াৰ সংক্ৰমণ দ্ৰুতগতিত বিয়পে ৷ নিপাহ ভাইৰাছত আক্ৰান্ত ব্যক্তিৰ প্ৰাৰম্ভিক লক্ষণ দেখা দিয়াৰ পিচত এই অৱস্থা দ্ৰুতগতিত অৱনতি ঘটিব পাৰে আৰু ই আক্ৰান্ত ব্যক্তিগৰাকীৰ বাবে মাৰাত্মক প্ৰমাণিত হ’ব পাৰে ৷
মালাপ্পুৰমত সতৰ্কতাবাণী জাৰি কৰাৰ পিচত লোৱা পদক্ষেপ
ছাত্ৰজনৰ মৃত্যুৰ পিছত প্ৰশাসনে সংক্ৰমিত অঞ্চলসমূহৰ ৫টা চিভিক ৱাৰ্ডক কণ্টেইনমেণ্ট জ’ন হিচাপে ঘোষণা কৰিছে ৷ এই সময়ছোৱাত মাস্ক পৰিধান কৰাটো বাধ্যতামূলক কৰা হৈছে ৷ সংক্ৰমণ ৰোধৰ বাবে বিদ্যালয়, মহাবিদ্যালয়, অংগনবাড়ী আদি শিক্ষানুষ্ঠান বন্ধ কৰি দিয়া হৈছে ৷ ইয়াৰ উপৰিও দোকান খোলাৰ আৰু বন্ধ কৰাৰ সময়ো নিৰ্ধাৰণ কৰা হৈছে ৷ সামাজিক সমাৱেশ আৰু জনবহুল অঞ্চলৰ পৰা আঁতৰি থাকিবলৈ প্ৰশাসনে ইতিমধ্যে আহ্বান জনাইছে ৷
১৭৫ টাতকৈও অধিক যোগাযোগ চিনাক্ত কৰা
সংক্ৰমণ ৰোধৰ বাবে স্বাস্থ্য বিভাগে কঠোৰ পৰিশ্ৰম কৰি সংস্পৰ্শলৈ অহা লোকসকলক চিনাক্ত কৰিছে ৷ ১৭৫ জনতকৈ অধিক সংস্পৰ্শলৈ অহা লোক চিনাক্ত কৰা হৈছে আৰু তেওঁলোকৰ ওপৰত তীক্ষ্ণ নজৰ ৰখা হৈছে ৷ তেওঁলোকক আছুতীয়াকৈ ৰখা হৈছে আৰু নিয়মীয়াকৈ পৰীক্ষা কৰা হৈছে ৷ ইয়াৰ লগতে সংক্ৰমিত ব্যক্তিৰ সংস্পৰ্শলৈ অহা আন লোকসকলকো সতৰ্ক কৰি দিয়া হৈছে যাতে যিকোনো নতুন সংক্ৰমণৰ আৰম্ভণি ৰোধ কৰিব পৰা যায় ৷
নিপাহ ভাইৰাছৰ লক্ষণ
- উচ্চ জ্বৰ
- মূৰৰ বিষ আৰু পেশীৰ বিষ
- ডিঙি বিষ
- দুৰ্বলতা আৰু ক্লান্তি
- উশাহ লোৱাত সমস্যা
- বমি আৰু ডায়েৰিয়া
- বিভ্ৰান্তি আৰু মানসিক অৱস্থাৰ পৰিৱৰ্তন
নিপা ভাইৰাছ কেনেকৈ বিয়পে ?
আক্ৰান্ত বাদুলিৰ জৰিয়তে নিপা ভাইৰাছ বিয়পে ৷ আক্ৰান্ত বাদুলিৰ শৰীৰৰ তৰল পদাৰ্থ যেনে লেলাউটি বা প্ৰস্ৰাৱৰ সংস্পৰ্শৰ দ্বাৰা এই ভাইৰাছ বিয়পিব পাৰে ৷ এই ভাইৰাছ সংক্ৰমিত ব্যক্তিৰ পৰা আন ব্যক্তিৰ দেহলৈও বিয়পিব পাৰে, গতিকে যিসকলে আক্ৰান্ত ব্যক্তিৰ সংস্পৰ্শলৈ আহিছে, তেওঁলোকে তৎক্ষণাত স্বাস্থ্য বিভাগৰ সৈতে যোগাযোগ কৰি নিজৰ স্বাস্থ্য পৰীক্ষা কৰোৱাটো অতি প্ৰয়োজনীয় ৷
