গুৱাহাটী,১৩ আগষ্ট: এসময়ৰ জনপ্ৰিয় এটা যুটিক এইবাৰ ভ্ৰাম্যমাণৰ মঞ্চত ওচৰৰ পৰা পাব দৰ্শকে । কেইবাখনো ভিচিডি আৰু বিহুগীতৰ জৰিয়তে দৰ্শকক মনমুগ্ধ কৰা এই অভিনেতা-অভিনেত্ৰীৰ যুটিতো এইবাৰ সাজু হৈছে ভ্ৰাম্যমাণ মঞ্চৰ জৰিয়তে দৰ্শকক মনোৰঞ্জন দিবলৈ । ভ্ৰাম্যমাণ এক অন্যতম নাট্যগোষ্ঠী 'ৰাজতিলক থিয়েটাৰ'ত এইবৰ্ষত থাকিব 'জানমণি' খ্যাত শ্যামন্তিকা শৰ্মা আৰু বহুকেইখন ছবি ভিচিডিত অভিনয় কৰি দৰ্শকৰ মন জয় কৰা এগৰাকী জনপ্ৰিয় অভিনেতা ৰাগ ঐনিতমে ।
লগতে অন্যান্য চৰিত্ৰসমূহ ৰূপায়ণ কৰিব মঞ্চৰ বলিষ্ঠ অভিনেতা বিনয় ডেকা, মিতুল বালাজী, জিনু বড়ো, নয়ন কৌশিক, বন্দনা ডেকা, উৎপল ঠাকুৰীয়া, ৰাকেশ দাস, মনোজ কাশ্যপ আদিৰ দৰে ন-পুৰণি মঞ্চাভিজ্ঞ শিল্পীয়ে । ইফালে অন্যান্য নাট্যগোষ্ঠীসমূহৰ দৰে আগন্তুক ২০২৪-২৫ নাট্যবৰ্ষৰ বাবে সাজু হৈ উঠিছে ৰাজতিলক থিয়েটাৰ গোষ্ঠী ।
তিনিখন নাটকেৰে সাজু হৈছে নাট্যদলটো । পূৰ্ণ্যোদ্যমেৰে চলি আছে নাটকৰ অন্তিম পৰ্যায়ৰ আখৰা । এই বৰ্ষৰ ৰাজতিলক থিয়েটাৰৰ নাট তিনিখন হৈছে অভিজিৎ ভট্টাচাৰ্যৰ 'ৰাজপথৰ ৰাজকুমাৰী', প্ৰণৱ বৰুৱাৰ 'নীলা চকুৰ গান' আৰু ধ্ৰুৱজ্যোতি শৰ্মাৰ 'অভিযন্তাৰ সেন্দুৰীয়া মন' । 'ৰাজপথৰ ৰাজকুমাৰী' নাটখনৰ আৱহ সংগীত কৰিছে অসমৰ জনপ্রিয় সংগীত পৰিচালক অৰূপজ্যোতি বৰুৱাই ।
ইতিমধ্যে এই নাটখনৰ 'কাজল আনি দিম...'শীর্ষক গীতটিয়ে সমাজিক মাধ্যমত যথেষ্ট সমাদৰ লাভ কৰিবলৈ সক্ষম হৈছে । গীতটিত কন্ঠদান কৰিছে প্ৰাণদ্বীপ আৰু নীলাভ নীতাই । ইফালে 'নীলা চকুৰ গান' নাটখনৰ আৱহ সংগীত সজাইছে অজয় ফুকনে । উল্লেখযোগ্য যে ,অহা ১৮ আগষ্টত ৰাজতিলক থিয়েটাৰে নাট্যযাত্ৰাৰ পাতনি মেলি ৰাইজৰ মাজলৈ ওলাই আহিব । এই কথা জানিবলৈ দিয়ে পৰিকল্পক অনুপ দাস আৰু সম্পাদক হীৰকজ্যোতি হাজৰিকাই ।
