চিটাৰা ডেস্ক, 3 ছেপ্টেম্বৰ : হন্সল মেহতাই পৰিচালনা কৰা ৰহস্যময় ছবি 'দ্য বাকিংহাম মাৰ্ডাৰ্ছ'ৰ ট্ৰেইলাৰ 3 ছেপ্টেম্বৰত মুক্তি দিয়া হয় ৷ ছবিখনত মুখ্য চৰিত্ৰত আছে কৰীণা কাপুৰ খান ৷ ট্ৰেইলাৰত বেবোৰ অভিনয় প্ৰশংসনীয় হৈছে ৷ এগৰাকী ডিটেক্টিভ চাৰ্জেণ্ট হিচাপে দৰ্শকক মনোৰঞ্জন দিব পাৰিছে কৰীণাই ৷
মঙলবাৰে মুম্বাইত 'দ্য বাকিংহাম মাৰ্ডাৰ্ছ'ৰ ট্ৰেইলাৰ মুকলি কৰা হয় । কৰীণা কাপুৰ খান, প্ৰযোজক একতা কাপুৰ আৰু চলচ্চিত্ৰখনৰ পৰিচালক হন্সল মেহতাকে ধৰি ছবিখনৰ দলটো 'দ্য বাকিংহাম মাৰ্ডাৰ্ছ'ৰ ট্ৰেইলাৰ মুকলি অনুষ্ঠানত উপস্থিত থাকে । ট্ৰেইলাৰ মুকলি অনুষ্ঠানত আৰম্ভ হয় প্ৰশ্ন-উত্তৰপৰ্ব ৷ সাংবাদিকে তাৰ মাজতে ল’লে শ্বাহিদৰ নাম ! তাৰ পিছত কৰীণা কাপুৰৰ প্ৰতিক্ৰিয়াই সকলোৰে দৃষ্টি আকৰ্ষণ কৰে ।
দৰাচলতে, এজন সাংবাদিকে 'দ্য বাকিংহাম মাৰ্ডাৰ্ছ'ৰ ট্ৰেইলাৰ মুকলি অনুষ্ঠানত শ্বাহিদ চলচ্চিত্ৰখনৰ কথা উল্লেখ কৰে ৷ পিছে মুখত হাঁহি বিৰিঙি পৰিল কৰীণাৰ ৷ সকলোৱে জানেই কৰীণাৰ প্ৰাক্তন প্ৰেমিকৰ নাম শ্বাহিদ কাপুৰ ৷ বলীউডৰ এজন অতিকে জনপ্ৰিয় অভিনেতা ৷ তেওঁৰ নামেৰেই আছে এখন চিনেমা, নাম শ্বাহিদ ৷ চলচ্চিত্ৰখন এখন চুপাৰহিট জীৱনীমূলক চলচ্চিত্ৰ, য'ত ৰাজকুমাৰ ৰাওৱে এজন উকীলৰ চৰিত্ৰত অভিনয় কৰিছে ।
সাংবাদিকজনে 'দ্য বাকিংহাম মাৰ্ডাৰ্ছ' চলচ্চিত্ৰখনৰ ট্ৰেইলাৰ মুকলি অনুষ্ঠানত সোধে, “ছাৰ আপুনি শ্বাহিদৰ দৰে এখন মহান চলচ্চিত্ৰ নিৰ্মাণ কৰিছে, আপুনি এই ছবিখনত কি বেলেগ আনিছে ?” সাংবাদিকজনে শ্বাহিদ বুলি উচ্চাৰণ কৰাৰ লগে লগে কৰীণা কাপুৰ খানৰ মুখৰ অভিব্যক্তি বেলেগ হৈ পৰে ।
শ্বাহিদ কাপুৰ আৰু কৰীণা কাপুৰ খানে এসময়ত ডেট কৰিছিল । কিবা কাৰণত দুয়ো পৃথক হয় । শ্বাহিদে মীৰা ৰাজপুতক বিয়া পাতে আৰু কৰীণাই অভিনেতা ছেইফ আলী খানৰ সৈতে বিয়াত বহে । শ্বাহিদ আৰু কৰীণাৰ হিট ছবি আছিল ‘জব উই মেট’ ।
'দ্য বাকিংহাম মাৰ্ডাৰ্ছ'ৰ ট্ৰেইলাৰ আজি মুক্তি দিয়া হৈছে আৰু ছবিখন 13 ছেপ্টেম্বৰত ছবিগৃহলৈ আহিব ।
লগতে পঢ়ক : মুক্তি পালে অপৰাধ-ৰহস্য-থ্ৰিলাৰেৰে পৰিপূৰ্ণ 'দ্য বাকিংহাম মাৰ্ডাৰ্ছ'ৰ টিজাৰ - The Buckingham Murders Teaser
