চিটাৰা ডেস্ক, ১৫ ফেব্ৰুৱাৰী: ‘ৰাঘৱ’ ছবিখনৰ পিচতে শেহতীয়াকৈ অভিনেতা যতীন বৰাই ঘোষণা কৰিছিল তেওঁৰ নতুন ছবি ‘অগ্নিবাণ’ ৷ ‘অগ্নিবাণ’ৰ ঘোষণাৰ পিচতে এতিয়া অনুৰাগীৰ বাবে আছে আন এটা ভাল খবৰ ৷ হয়, যতীন বৰাই ঘোষণা কৰিছে আন এখন নতুন ছবি ৷ শীঘ্ৰেই ছবিগৃহত আহিব যতীন বৰা অভিনীত নতুন ছবি ‘চেলেঞ্জ’ । বৃহস্পতিবাৰে ছবিখনৰ পোষ্টাৰ মুকলি কৰা হয় । হোটেল ভিভান্তা তাজত অনুষ্ঠিত এক অনুষ্ঠানত এই ছবিখনৰ বিষয়ে ঘোষণা কৰা হয় ৷ এই অনুষ্ঠানত উপস্থিত থাকে ডি আই জি পার্থসাৰথি মহন্ত, সাংসদ পৱিত্ৰ মাৰ্ঘেৰিটা, অভিনেতা যতীন বৰা প্ৰমুখ্যে বহু বিশিষ্ট ব্যক্তি ।
উল্লেখ্য যে, ছবিখনৰ মুখ্য প্ৰযোজনাৰ দায়িত্বত আছে মুম্বাই চিনে মেলডী । এন জে আৰু এদল যুৱ পৰিচালকৰ পৰিচালনাত নির্মাণ হ’বলগীয়া ‘চেলেঞ্জ’ৰ কাহিনী - চিত্ৰনাট্য আৰু সংলাপ অভিজিত ভট্টাচার্যৰ । ছবিখনৰ সহঃ প্ৰযোজনাৰ দায়িত্বত আছে চৈয়দ হাফিজুল ইছলাম । ছবিখনৰ সংগীত তথা আৱাহ সংগীত অজয় ফুকনৰ ।
এই ছবিখনৰ মুখ্য চৰিত্ৰত অভিনয় কৰা দেখা যাব যতীন বৰাক । আনহাতে, মুখ্য নায়িকাৰ চৰিত্ৰত দেখা নাযাব অসমৰ কোনো অভিনেত্ৰীক ৷ হয়, এই ছবিখনত মুখ্য নায়িকাৰ চৰিত্ৰত থাকিব অসমৰ পৰিৱৰ্তে বলিউডৰ এগৰাকী অভিনেত্ৰী । অৱশ্যে কোন সেইগৰাকী অভিনেত্ৰীগৰাকী সেই কথা এতিয়ালৈকে জনোৱা নাই নিৰ্মাতাই ৷
উল্লেখযোগ্য যে, ৰাষ্ট্ৰীয় পৰ্যায়ত মুক্তি দিয়াৰ লক্ষ্যৰে নিৰ্মাণ কৰা হ’ব এই ছবিখন । অৱশ্যে ছবিখন কেৱল অসমীয়া ভাষাতেই নহয়, হিন্দী আৰু বাংলা ভাষাতো মুকলি হ’ব । অসমৰ উপৰিও দিল্লী, লক্ষ্ণৌ আৰু হায়দৰাবাদৰ ৰমোজী ফিল্ম চিটিতো চিত্ৰগ্ৰহণ হ’ব ছবিখনৰ । অসম তথা বাংলাৰ বহু আগশাৰীৰ শিল্পীয়ে ছবিখনত বিশেষ ভূমিকা পালন কৰিব । ছবিখনত থাকিব লগা পাঁচটা গীতত কণ্ঠদান কৰিব অসমৰ লগতে বলিউডৰ বহুকেইগৰাকী কণ্ঠশিল্পীয়ে ।
মে’ মাহৰ দ্বিতীয় সপ্তাহৰ পৰা আৰম্ভ হ’ব ছবিখনৰ শ্বুটিং । চলিত বৰ্ষৰে অক্টোবৰ নৱেম্বৰত মাহতে মুক্তি দিয়া হ’ব ছবিখন । আহিবলগীয়া এই নতুন ছবিখনক লৈ এতিয়া আশাবাদী ছবিখনৰ পৰিচালক তথা কলা-কুশলীসকল ।
লগতে পঢ়ক: ৰাঘৱৰ পিচত এইবাৰ আহি আছে যতীন বৰাৰ অগ্নিবাণ
