হায়দৰাবাদ : এক সহযোগিতামূলক গৱেষণাই প্ৰকাশ কৰিছে যে গোদাৱৰী নদীৰ প্ৰদূষিত পানী সাগৰৰ সৈতে মিলিত হোৱা বংগোপসাগৰৰ অঞ্চলবোৰত অক্সিজেনৰ স্তৰ হ্ৰাস পাইছে । যাৰ ফলত সামুদ্ৰিক জীৱনত যথেষ্ট প্ৰভাৱ পৰিছে । চি এছ আই আৰ-নেচনেল ইনষ্টিটিউট অব অশ্বেন'গ্ৰাফী (গোৱা)ৰ ড৹ শ্ৰীজিতৰ নেতৃত্বত হায়দৰাবাদ বিশ্ববিদ্যালয়ৰ (এইচ চি ইউ) ডঃ ফেব্ৰুৱা ফ্ৰান্সিছ আৰু ৰাষ্ট্ৰীয় সাগৰবিজ্ঞান প্ৰতিষ্ঠানৰ (ভাইজাগ) ড৹ ভি ভি এছ এছ শৰ্মাৰ সহযোগত এই অধ্যয়নটো সম্পন্ন কৰা হৈছিল ।
এই অধ্যয়নৰ ফলাফলবোৰ যোৱা ৪ নৱেম্বৰত আন্তৰ্জাতিক আলোচনী ফ্ৰণ্টিয়াৰ্ছ ইন মেৰিন ছায়েন্সত প্ৰকাশ পাইছে আৰু বৃহস্পতিবাৰে এইচ চি ইউৰ এক বিবৃতিত এই বিষয়ত আলোকপাত কৰা হয় ।
মুখ্য ফলাফলসমূহ :-
প্ৰভাৱিত এলেকা : গোদাৱৰী নদীয়ে বংগোপসাগৰৰ সৈতে মিলিত হোৱা 10 কিলোমিটাৰ দৈৰ্ঘৰ এক বিস্তৃত অঞ্চলত অক্সিজেনৰ স্তৰ উদ্বেগজনকভাৱে হ্ৰাস হোৱা দেখা গৈছে ।
প্ৰদূষণৰ কাৰকসমূহ
- জৈৱিক আৱৰ্জনা- ইয়াৰ ভিতৰত আছে পৰি যোৱা গছ আৰু গোদাৱৰীয়ে কঢ়িয়াই অনা অন্যান্য পদাৰ্থই সাগৰৰ পানীত জৈৱিক বোজা বৃদ্ধি কৰে ।
- পেট্ৰ'ল আৰু ডিজেলৰ অৱশিষ্টাংশকে ধৰি মটৰবোটৰ পৰা অহা প্ৰদূষকে সমস্যাটো বৃদ্ধি কৰিছে ।
সামুদ্ৰিক জীৱনৰ ওপৰত প্ৰভাৱ
এই অঞ্চলত হাইপোক্সিয়া বুলি কোৱাঅক্সিজেন হ্ৰাস হোৱাৰ ফলত জলজ পৰিস্থিতিতন্ত্ৰৰ বাবে এক গুৰুতৰ ভাবুকি সৃষ্টি হৈছে । অক্সিজেনৰ স্তৰ হ্ৰাস হোৱাৰ ফলত মাছ আৰু অন্যান্য সামুদ্ৰিক জীৱৰ বিপদাশংকা বৃদ্ধি পাইছে । যাৰ ফলত জৈৱ-বৈচিত্ৰ্য হ্ৰাস হোৱাৰ সম্ভাৱনা আছে আৰু খাদ্য শৃংখলাত ব্যাঘাত ঘটিব পাৰে ।
অধ্যয়নটোৰ তাৎপৰ্য
গৱেষণাটোৱে গোদাৱৰী নদীক প্ৰদূষণৰ পৰা সুৰক্ষা কৰা আৰু বংগোপসাগৰত ইয়াৰ নিম্নমুখী প্ৰভাৱ হ্ৰাস কৰাৰ বাবে ব্যৱস্থা ৰূপায়ণ কৰাৰ জৰুৰী প্ৰয়োজনীয়তাৰ ওপৰত গুৰুত্ব আৰোপ কৰিছে । অধ্যয়নৰ ফলাফলবোৰে এই পদক্ষেপবোৰ গ্ৰহণৰ বাবে আহ্বান জনাইছে :
- নদীত প্ৰৱেশ কৰা প্ৰদূষকৰ ওপৰত কঠোৰ নিয়মাৱলী ।
- মটৰবোট ব্যৱহাৰ কৰা মাছমৰীয়াসকলৰ মাজত পৰিষ্কাৰ পদ্ধতিৰ প্ৰচাৰ কৰা ।
- নদী আৰু সামুদ্ৰিক প্ৰদূষণৰ পাৰিপাৰ্শ্বিক পৰিণামৰ ওপৰত আলোকপাত কৰিবলৈ সজাগতা অভিযান ।
অধ্যয়নটোৱে নদী প্ৰদূষণ আৰু সাগৰৰ স্বাস্থ্যৰ মাজত আন্তঃসংযোগৰ বিষয়ে গুৰুত্বপূৰ্ণ অন্তৰ্দৃষ্টি প্ৰদান কৰে । লগতে অঞ্চলটোৰ ভংগুৰ সামুদ্ৰিক পৰিস্থিতিতন্ত্ৰ সুৰক্ষিত কৰাৰ বাবে তাৎক্ষণিক পদক্ষেপ ল'বলৈ আহ্বান জনায় ।
