নিউজ ডেস্ক, ৬ ফেব্ৰুৱাৰী : এইগৰাকী ৬ বছৰীয়া শিশুৰ ফালে লক্ষ্য কৰিলে কোনেও বিশ্বাস কৰিব নোৱাৰিব যে এই পুতলাৰ দৰে নিষ্পাপ শিশুটিয়ে ৮০ কিলোগ্ৰাম ওজন ডাঙিব পাৰে । গুজৰাটৰ চুৰাট চহৰৰ এইগৰাকী শিশু শক্তি উত্তোলক তথা ভাৰোত্তোলকে এতিয়া সকলোকে আচৰিত কৰিছে । শিশুটিৰ নাম হৈছে য়েতি জেঠৱা ।
আনহাতে, শিশুটিয়ে ইমান কম বয়সতে বৰ্তমানলৈকে শক্তি উত্তোলন আৰু ভাৰোত্তোলনত 17 টাতকৈও অধিক পদক জয় কৰিছে । য়েতিয়ে বৰ্তমান প্ৰথম শ্ৰেণীত অধ্যয়ন কৰি আছে । আনহাতে, তেওঁৰ পিতৃ ৰবি জেঠৱা হৈছে এগৰাকী জিম প্ৰশিক্ষক আৰু মাতৃ শিক্ষয়িত্ৰী । য়েতিৰ সপোন হৈছে ভাৰোত্তোলনৰ ক্ষেত্ৰত কেৰিয়াৰ গঢ়ি তোলা আৰু ডাঙৰ হ'লে সুনাম অৰ্জন কৰা ।
য়েতিয়ে কয় যে তেওঁ শক্তি উত্তোলন বা পাৱাৰ লিফটিং কৰি ভালপায় । তেওঁ স্কুলৰ পৰা অহাৰ পিছত প্ৰতিদিনে 2 ঘণ্টাৰ বাবে পাৱাৰ লিফটিং কৰে আৰু তেওঁ নিজৰ খাদ্য তালিকাৰ ওপৰতো যত্ন লয় । তেওঁ ডাঙৰ হৈ এগৰাকী বিখ্যাত শক্তি উত্তোলক তথা ভাৰোত্তোলক হ'ব বিচাৰে ।
আনহাতে, য়েতিৰ পিতৃ ৰবি জেঠৱাই কয় যে যেতিয়া তেওঁৰ বয়স 2 বছৰ আছিল, তেতিয়াই তেওঁক জিমলৈ লৈ গৈছিল । তাৰ পিছত হঠাতে য়েতিয়ে জিমত পৰি থকা পাৱাৰ লিফটিং সঁজুলিৰ প্ৰতি আগ্ৰহী হৈ পৰে । তেওঁৰ আগ্ৰহ দেখি ৰবিয়ে লাহে লাহে তেওঁক পাৱাৰ লিফটিঙৰ প্ৰশিক্ষণ দিবলৈ আৰম্ভ কৰে । কিন্তু পূৰ্বতে তেওঁ নাজানিছিল যে তেওঁ ইমান ভাল প্ৰদৰ্শন কৰিব পাৰে ।
বৰ্তমান তেওঁৰ বয়স ৬ বছৰ আৰু ওজন হৈছে ২৭ কিলোগ্ৰাম । কিন্তু যেতিয়াই তেওঁ কোনো প্ৰতিযোগিতালৈ যায়, আনকি ভাল পাৱাৰ লিফ্টাৰসকলেও তেওঁক দেখি আচৰিত হয় । য়েতিয়ে সহজে ৮০ কিলোগ্ৰাম ওজন ডাঙিব পাৰে ।
য়েতিৰ পিতৃয়ে লগতে প্ৰকাশ কৰে যে তেওঁ এগৰাকী বিশুদ্ধ নিৰামিষভোজী । আনহাতে বহুতে কয় যে কম বয়সতে পাৱাৰ লিফ্টিং কৰিলে উচ্চতা বৃদ্ধিত সমস্যা হয় । কিন্তু এনে নহয় বুলি ৰবিয়ে প্ৰকাশ কৰে । যদি সঠিক প্ৰশিক্ষণ দিয়া হয়, তেন্তে যিকোনো কথায়ে সম্ভৱ বুলি তেওঁ মন্তব্য কৰে । লগতে তেওঁ পুত্ৰ এগৰাকী মহান ভাৰোত্তোলক হ'ব বুলিও আশা ব্যক্ত কৰে । তেওঁ প্ৰতিদিনে ২ ঘণ্টা জিমত ব্যায়াম কৰায় আৰু প্ৰশিক্ষণ দিয়ে । বয়স অনুপাতে য়েতি নৱম কেটেগৰিত পৰে । কিন্তু তেওঁ ওজন ইমান বঢ়াই দিয়ে যে তেওঁৰ বয়সৰ কোনো শিশুৱে তেওঁৰ সন্মুখত থিয় হ'ব নোৱাৰে ।
লগতে পঢ়ক :দক্ষিণ আফ্ৰিকাৰ বিৰুদ্ধে কেন উইলিয়ামছনৰ ঐতিহাসিক শতক
