লাডাখ: ভাৰত আৰু চীনৰ মাজত দৃঢ় চুক্তিৰ পাছত পূব লাডাখৰ ডেমচোক আৰু ডেপছাং সমভূমিৰ দুটা স্থানৰ পৰা দুয়ো দেশৰ সেনা পিছুৱাই গৈছে আৰু এই স্থানসমূহত অতি সোনকালে টহল আৰম্ভ হ’ব বুলি ভাৰতীয় সেনাৰ সূত্ৰই প্ৰকাশ কৰিছে । দীপাৱলী উপলক্ষে বৃহস্পতিবাৰে দুয়ো পক্ষৰ মাজত মিঠাইৰ আদান-প্ৰদান হ’ব বুলিও তেওঁলোকে জানিবলৈ দিয়ে ।
সূত্ৰসমূহে লগতে কয় যে সেনাৰ বিচ্ছিন্নতাৰ পাছত নিৰীক্ষণ চলি আছে আৰু গ্ৰাউণ্ড কমাণ্ডাৰৰ মাজত টহল দিয়াৰ সিদ্ধান্ত ল’ব লাগিব । স্থানীয় কমাণ্ডাৰ পৰ্যায়ত আলোচনা অব্যাহত থাকিব বুলি সেনাবাহিনীৰ এক সূত্ৰই প্ৰকাশ কৰিছে ।
২৫ অক্টোবৰত সেনাৰ সূত্ৰই জনাইছিল যে ২৮-২৯ অক্টোবৰৰ ভিতৰত এই প্ৰক্ৰিয়া সম্পূৰ্ণ হোৱাৰ সম্ভাৱনা আছে । চুক্তিখনৰ কাঠামো প্ৰথমে কূটনৈতিক পৰ্যায়ত স্বাক্ষৰ কৰা হৈছিল আৰু তাৰ পিছত সামৰিক পৰ্যায়ৰ আলোচনা হৈছিল বুলি তেওঁলোকে কয় ৷ যোৱা সপ্তাহত স্বাক্ষৰিত হোৱা কৰ্পছ কমাণ্ডাৰ পৰ্যায়ৰ আলোচনাৰ সময়ত চুক্তিখনৰ ক্ষুদ্ৰ ক্ষুদ্ৰ বিষয়টোৰ ওপৰত কাম কৰা হৈছিল বুলিও তেওঁলোকে লগতে কয় ।
দুয়োপক্ষৰ মাজত হোৱা চুক্তিসমূহ মানি চলি ভাৰতীয় সৈন্যই তাৰ পাছত এই অঞ্চলসমূহৰ পিছৰ স্থানসমূহলৈ পিছুৱাই আহিবলৈ আৰম্ভ কৰে । পূব লাডাখত প্ৰকৃত নিয়ন্ত্ৰণ ৰেখাত (এল এ চি) সৈন্যক টহল দিয়া আৰু বিচ্ছিন্ন কৰাৰ ক্ষেত্ৰত দুয়োখন দেশৰ মাজত দৃঢ় কৰা চুক্তিৰ পাছতে এই প্ৰক্ৰিয়াটো কৰা হৈছে ৷ যিটো চাৰি বছৰতকৈও অধিক সময় ধৰি চলি অহা স্থবিৰতাৰ অন্ত পেলোৱাৰ বাবে এক বৃহৎ অগ্ৰগতি ।
২০২০ চনৰ জুন মাহত গালৱান উপত্যকাত সংঘটিত হোৱা ভয়াৱহ সংঘৰ্ষৰ পাছত এছিয়াৰ দুয়োখন দেশৰ মাজৰ সম্পৰ্ক বিঘ্নিত হৈছিল আৰু যিটোৱে দুয়োপক্ষৰ মাজত দশক দশক ধৰি চলি অহা আটাইতকৈ গুৰুতৰ সামৰিক সংঘাতৰ ৰূপ ধাৰণ কৰিছিল । সূত্ৰসমূহে পূৰ্বে প্ৰকাশ কৰা অনুসৰি অঞ্চলসমূহ আৰু টহলদাৰী মৰ্যাদা ২০২০ চনৰ এপ্ৰিলৰ পূৰ্বৰ স্তৰলৈ ঘূৰাই অনাৰ সম্ভাৱনা আছে ।
লগতে পঢ়ক: টাৱাঙত 'অখ্যাত নায়ক' মেজৰ বব খাটিঙৰ সংগ্ৰহালয় মুকলি কৰিব ৰাজনাথ সিঙে
