তুৰা, ৪ জুন : বহু প্ৰতীক্ষাৰ অন্ত পেলাই মঙলবাৰে ঘোষণা হ’ব লোকসভা নিৰ্বাচন 2024 ৰ ফলাফল ৷ দেশজুৰি পুৱা 8 বজাৰ পৰা আৰম্ভ হৈছে ভোটগণনা ৷ দিনটোৰ শেষৰ ফালে ঘোষণা হ’ব বহু প্ৰতীক্ষিত ফলাফল ৷ ৭৫ দিনতকৈ অধিক সময় ধৰি চলি থকা চৰ্চাৰ অন্তত দেশৰ 543 টা লোকসভা সমষ্টিত চলিছে ভোটগণনা । এই গণনাত সকলোৰে দৃষ্টি নিৱদ্ধ হৈছে উত্তৰ পৃৰ্বাঞ্চলৰ ৰাজ্য় কেইখনত । মেঘালয়ৰ ২ টা লোকসভা সমষ্টিৰ ভিতৰত তুৰা সমষ্টিত আগবাঢ়ি আছে কংগ্ৰেছ দলৰ প্ৰাৰ্থী চালেং এ চাংমা । দুপৰীয়া ১২ বজালৈ হোৱা ভোটগণনাত ১ লাখ ৩৯,০১২ ভোটত আগবাঢ়ি আছে কংগ্ৰেছ দলৰ প্ৰাৰ্থী চালেং এ চাংমা ।
মেঘালয়ৰ তুৰাত বতাহ ধুমুহাৰ মাজত অব্যাহত ভোটগণনা । পুৱা ৮ বজাৰ পৰা তুৰাত আৰম্ভ হৈছে ভোটগণনা । পোনপ্ৰথমবাৰৰ বাবে তুৰাৰ আন্তঃৰাজ্যিক বাছ টাৰ্মিনেলত ভোটগণনা প্ৰক্ৰিয়া অনুষ্ঠিত কৰা হৈছে ৷ মুঠ ১৩২ খন টেবুলত ই ভি এম আৰু ৮ খন টেবুলত বেলট বাকচৰ গণনা কৰা হৈছে । পশ্চিম গাৰো পাহাৰ জিলাৰ ১১ টা বিধানসভা সমষ্টিৰ গণনা কৰা হৈছে তুৰাত । তুৰা লোকসভা সমষ্টিৰ অন্তৰ্গত ৫ খন জিলাত সমগ্ৰ গণনা প্ৰক্ৰিয়া চলিব ।
আজি গণনাৰ পাচতেই ভাগ্য নিৰ্ণয় হ’ব কংগ্ৰেছ দলৰ প্ৰাৰ্থী চালেং এ চাংমা, এন পি পি দলৰ আগাথা চাংমা, তৃণমূল কংগ্ৰেছ দলৰ জেনিথ চাংমা, নিৰ্দলীয় প্ৰাৰ্থী লাবেন মাৰাকৰ । দুপৰীয়া ১২ বজালৈ হোৱা ভোটগণনাত ৩,৪০,৫১৬ টা ভোট লাভ কৰি ১ লাখ ৩৯,০১২ ভোটত কংগ্ৰেছ দলৰ প্ৰাৰ্থী চালেং এ চাংমা আগবাঢ়ি আছে । ইয়াৰ বিপৰীতে এন পি পি দলৰ আগাথা চাংমা লাভ কৰিছে ২,০১,৫০৪ ।
লোকসভা নিৰ্বাচনৰ ফলাফলৰ অধিক বা-বাতৰিৰ বাবে ক্লিক কৰক :
https://www.etvbharat.com/en/!elections/election-2024
