গুজৰাট: গুজৰাটৰ পোৰবন্দৰ দেওবাৰে পুৱা ভাৰতীয় উপকূলৰক্ষী বাহিনীৰ এখন হেলিকপ্টাৰ হেলিপেডত অৱতৰণ কৰি থকা অৱস্থাত দুৰ্ঘটনাগ্ৰস্ত হৈ তিনিজন ক্ৰু মেম্বাৰ নিহত হয় । অৱশ্যে ভাৰতীয় উপকূলৰক্ষী বাহিনীয়ে বৰ্তমান পৰ্যন্ত এই সন্দৰ্ভত কোনো আনুষ্ঠানিক তথ্য প্ৰকাশ কৰা নাই ৷ জানিব পৰা মতে সম্প্ৰতি পোৰবন্দৰৰ চৰকাৰী চিকিৎসালয়ত ৰখা হৈছে জোৱানকেইজনৰ মৃতদেহ ৷
এই দুৰ্ঘটনা সংঘটিত হোৱাৰ লগে লগে উদ্ধাৰ আৰু সাহায্য অভিযান আৰম্ভ কৰা হয় ৷ ঘটনাস্থলীত পোৰবন্দৰ অগ্নিনিৰ্বাপক বাহিনী উপস্থিত হৈ পানীৰ কামান ব্যৱহাৰ কৰি জুই নিৰ্বাপন কৰে আৰু জোৱানকেইজনক সংকটজনক অৱস্থাত উদ্ধাৰ কৰি পোৰবন্দৰৰ চৰকাৰী চিকিৎসালয়লে প্ৰেৰণ কৰে ৷ ইয়াৰ পাচতেই চৰকাৰী চিকিৎসালয়ৰ এটা সূত্ৰই জোৱানকেইজনৰ মৃত্যু হোৱাৰ কথা জানিবলৈ দিয়ে ৷ চিকিৎসালয়ত জোৱানকেইজনৰ পৰৱৰ্তী সকলো কাম-কাজ সম্পন্ন কৰাৰ পাছত তেওঁলোকৰ মৃতদেহ পৰিয়ালৰ লোকক চমজাই দিয়া হ’ব বুলি জানিব পৰা হৈছে ৷
ইফালে এই খবৰ লাভ কৰাৰ পাচতেই পোৰবন্দৰৰ বিধায়ক অৰ্জুনভাই মোধৱাদিয়া আৰু তেওঁৰ ভাতৃ ৰামদেৱভাই মোধৱাদিয়াই ততাতৈয়াকৈ চৰকাৰী চিকিৎসালয়ত উপস্থিত হয় আৰু সমগ্ৰ ঘটনাৰ বুজ লয় ৷ তেওঁলোকে এই ঘটনাক লৈ শোক প্ৰকাশ কৰাৰ লগতে শোকসন্তপ্ত পৰিয়ালক সমবেদনা জ্ঞাপন কৰে ৷
ইপিনে পোৰবন্দৰৰ আৰক্ষী অধীক্ষক ভগীৰথ সিং জাডেজা আৰু উপকূলৰক্ষী বাহিনীৰ উপ-মহাপৰিদৰ্শক পংকজ আগৰৱালাও চিকিৎসালয়খনত উপস্থিত হয় ৷ অৱশ্যে তেওঁলোকেও এই সন্দৰ্ভত বৰ্তমান কোনো মন্তব্য দিয়াৰ পৰা বিৰত থাকে ৷ উল্লেখ্য যে, ইয়াৰ পূৰ্বে বিগত বৰ্ষৰ ৩ ছেপ্টেম্বৰত পোৰবন্দৰৰ ওচৰত আৰৱ সাগৰত ভাৰতীয় উপকূলৰক্ষী বাহিনীৰ এডভান্স লাইট হেলিকপ্টাৰ (এএলএইছ) দুৰ্ঘটনাগ্ৰস্ত হৈছিল ৷ এইটো দ্বিতীয়টো ঘটনা য’ত তিনিজন জোৱানৰ মৃত্যু হৈছে ৷
