নেশ্যনেল ডেস্ক, 27 ফেব্ৰুৱাৰী : এগৰাকী বিশেষ ব্যক্তি ৷ তেওঁৰ জন্ম জাপানত ৷ ভাৰতৰ প্ৰতি তেওঁৰ আছে অদ্ভূত প্ৰেম ৷ কেৱল হিন্দীতে নহয় পঞ্জাবী-বাংলা ভাষাতো আছে তেওঁৰ দখল ৷ কেৱল নিজে হিন্দী শিকিয়েই তেওঁ ক্ষান্ত হোৱা নাই ৷ এই জাপানীগৰাকীয়ে বিশ্ববাসীক হিন্দী শিকোৱাৰো দায়িত্ব লৈছে ৷
আমি উল্লেখ কৰা এই জাপানীগৰাকী হৈছে অৱসৰপ্ৰাপ্ত অধ্যাপক ড৹ টমিঅ’ মিজোকামী ৷ ইতিমধ্যে অৱসৰপ্ৰাপ্ত জাপানী এই অধ্যাপকগৰাকীক ভাৰতে পদ্মশ্ৰী বঁটাৰও সন্মানিত কৰিছে ৷ ই টিভি ভাৰতৰ সৈতে হোৱা এক সাক্ষাৎকাৰত তেওঁ ব্যক্ত কৰে সকলো অভিজ্ঞতা ৷
হিন্দীৰ প্ৰেমত কেনেকৈ পৰিল... প্ৰথমবাৰ কেনেকৈ হিন্দী ভাষাৰ সৈতে চিনাকী হ’ল ?
এই প্ৰশ্নটো শুনি এটা মিচিকিয়া হাঁহিৰে টমিঅ' মিজোকামীয়ে ক'লে, "এইটো এটা অতি দীঘলীয়া কাহিনী ৷ মই ইয়াক ক'বলৈ বৰ নাৰ্ভাছ হৈছো । মই মোৰ কিতাপখনত ইয়াৰ বিষয়ে বিতংভাৱে লিখিছো’’ । তেওঁ কয়, ‘‘মোৰ জন্মস্থান পশ্চিম জাপানৰ কোবেত । য'ত বৃহৎ সংখ্যক প্ৰবাসী ভাৰতীয়ই বাস কৰে । সেই মানুহবোৰে মোক প্ৰভাৱিত কৰিছে । স্কুলত মই বৰ শান্ত স্বভাৱৰ আছিলো । প্ৰবাসী ভাৰতীয়ৰ পৰা হিন্দী ক'বলৈ শিকিলো’’ ৷
ভাৰতলৈ আহিব বিচাৰিছিলো সেয়ে হিন্দী শিকিলো :
টমিঅ’ মিজোকামীয়ে কয়, "মই ভাৰতলৈ আহিব বিচাৰিছিলো । আনকি হিন্দী ভাষাৰ জৰিয়তে ব্যৱসায় কৰিব বিচাৰিছিলো । সেই ইচ্ছা পূৰণ হৈছিল ৷ ইয়াৰ মাজতে আহিল মোৰ শৈক্ষিক জীৱন ৷ হিন্দীত BA, MA কৰিলো । ছাত্ৰ হৈ থাকোতে মই কোনো ভৱিষ্যৎ দেখা নাছিলো ৷ আনকি মই মোৰ ভৱিষ্যৎ গঢ়িবলৈ হিন্দীও পঢ়া নাছিলো । হিন্দী ভাষাটো মোৰ বৰ প্ৰিয় আছিল ৷ সেয়ে হিন্দীত মই স্নাতক আৰু স্নাতকোত্তৰ ডিগ্ৰী গ্ৰহণ কৰিলো’’ ৷
ইউৰোপীয় ভাষাতকৈ হিন্দী ভাষা সহজ
টমিঅ’ মিজোকামীয়ে কয়, "আমি যদি হিন্দীৰ কথা কওঁ, তেন্তে ব্যাকৰণৰ ক্ষেত্ৰত ইউৰোপীয় ভাষাৰ তুলনাত হিন্দী কঠিন নহয় ৷ ব্যাকৰণ অতি সহজ । ইয়াৰ ব্যৱহাৰৰ বাবে অনুশীলন কৰা প্ৰয়োজন ৷ শিকিবলৈ টান নহয়’’ ।
প্ৰধানমন্ত্ৰী মোদীৰ হিন্দী হৈছে সংস্কৃতৰ আধাৰ :
কোনজন ভাৰতীয় ৰাজনীতিবিদৰ হিন্দীয়ে তেওঁক প্ৰভাৱিত কৰে সেই প্ৰশ্নত টমিঅ' মিজোকামীয়ে কয়, "প্ৰধানমন্ত্ৰী নৰেন্দ্ৰ মোদীৰ হিন্দী বৰ ভাল । তেওঁৰ হিন্দী হৈছে সংস্কৃত নিষ্ঠ হিন্দী । সাধাৰণ জনতাৰ বাবে অলপ কঠিন হ’ব পাৰে, কিন্তু আমাৰ বাবে অতি স্পষ্ট ।''
তেওঁ কয়, ‘‘মই ভাৰতীয়ক কওঁ যে হিন্দীত ভৱিষ্যৎ আছে । আটাইতকৈ ডাঙৰ কথাটো হ’ল ই আপোনাৰ মাতৃভাষা । মাতৃভাষাক সকোলোৱে ভালপোৱা উচিত ৷ ইংৰাজী শিকিলে ভাল ৷ ইংৰাজী অবিহনে কাম কৰিব নোৱাৰি । কিন্তু ইংৰাজীত্ব বাদ দিয়ক । অপ্ৰয়োজনীয়ভাৱে আপোনালোকৰ মানুহে নিজেই ইংৰাজীত্ব গ্ৰহণ কৰিছে । এই ইংৰাজীত্ব ইংৰাজৰ উপহাৰ নহয়, ভাৰতীয়ই নিজেই অৰ্জন কৰিছে’’ ।
হৃদয়ৰ ভাষা হৈছে হিন্দী :
টমিঅ’ মিজোকামীৰ মতে হৃদয়ৰ ভাষা হৈছে হিন্দী । হিন্দী ভাষাত আছে আপোনত্ব ৷ তেওঁ কয়, "হিন্দী, পঞ্জাবী আৰু বাংলা ভাষাত কথা পাতি ভাল লাগে । হিন্দীত কথা কোৱাটো এটা আৱেগ ৷ প্ৰয়োজনত মই ইংৰাজী কওঁ । ইংৰাজীৰ লগত মোৰ কোনো আৱেগিক সম্পৰ্ক নাই । মই ভাৰতীয় ভাষাত কথা পাতি ভালপাওঁ ৷ সেয়া লাগিলে হিন্দীয়ে হওক বা বাংলাই হওক । হিন্দীত কথা ক’লে মই নিজকে ভাৰতীয় বুলি ভাবো ৷ হয়তো বৰ্তমান মই মনে-প্ৰাণে ভাৰতীয় হৈ পৰিছো’’ ৷
উল্লেখ্য যে, 2018 চনত ওছাকা বিশ্ববিদ্যালয়ৰ (Osaka University) অধ্যাপক ড৹ টমিঅ’ মিজোকামীক হিন্দী দক্ষতা আৰু শিক্ষাৰ ক্ষেত্ৰত অৱদানৰ বাবে পদ্মশ্ৰী বঁটাৰে সন্মানিত কৰা হৈছিল ৷
লগতে পঢ়ক : মানাহ ৰাষ্ট্ৰীয় উদ্যানত আৰম্ভ হস্তী গণনা প্ৰক্ৰিয়া
