নেশ্যনেল ডেস্ক, 27 মে’: দিল্লী আবকাৰী নীতিৰ সৈতে জড়িত ধন সৰবৰাহৰ গোচৰত উচ্চতম ন্যায়ালয়ৰ পৰা মুখ্যমন্ত্ৰী অৰবিন্দ কেজৰিৱালক প্ৰদান কৰা অন্তৱৰ্তীকালীন জামিন শেষ হ’বলৈ ওলাইছে । 2 জুনত আত্মসমৰ্পণ কৰিব লাগিব মুখ্যমন্ত্ৰীগৰাকীয়ে । আত্মসমৰ্পণৰ পূৰ্বে উচ্চতম ন্যায়ালয়ৰ দ্বাৰস্থ হৈছে অৰবিন্দ কেজৰিৱাল ৷ অতিমধ্যে শীৰ্ষ আদালতত আবেদন দাখিল কৰিছে মুখ্যমন্ত্ৰীগৰাকীয়ে । মুখ্যমন্ত্ৰীগৰাকীৰ অন্তৱৰ্তীকালীন জামিন পুনৰ 7 দিন বৃদ্ধিৰ বাবে আবেদন জনাইছে কেজৰিৱালে ।
উচ্চতম ন্যায়ালয়ত অৰবিন্দ কেজৰিৱালৰ হৈ দাখিল কৰা আবেদনত কেজৰিৱালৰ কিট’ন (Ketone) ৰ মাত্ৰা অতি উচ্চ হৈ পৰিছে বুলি উল্লেখ কৰি কেজৰিৱালৰ সম্পূৰ্ণ দেহৰ পৰীক্ষা সম্পূৰ্ণ কৰিবলৈ সাত দিনৰ সময় বিচৰা হৈছে বুলি আবেদনখনত উল্লেখ আছে ।
শৰীৰৰ ওজন কমিছে কেজৰিৱালৰ: আপে কৈছে, "কেজৰিৱালৰ ওজন সাত কেজি হ্ৰাস পাইছে । এইবোৰ কোনো গুৰুতৰ ৰোগৰ লক্ষণ হ'ব পাৰে । মেক্স হাস্পতালৰ চিকিৎসকে তেওঁক পৰীক্ষা কৰিছিল । তেওঁ (অৰবিন্দ কেজৰিৱাল) পিইটি-চিটি স্কেন আৰু আন বহুতো পৰীক্ষা কৰিব লাগিব । তেওঁ সাত দিনৰ সময় বিচাৰিছে" ৷
২ জুনত আত্মসমৰ্পণ কৰিব লাগিব: নিৰ্বাচনী প্ৰচাৰৰ বাবে কেজৰিৱালক অন্তৱৰ্তীকালীন জামিন প্ৰদান কৰিছিল উচ্চতম ন্যায়ালয়ে । মুখ্যমন্ত্ৰী কেজৰিৱালে 5 জুনলৈকে আদালতৰ পৰা অন্তৱৰ্তীকালীন জামিন বিচাৰিছিল যদিও উচ্চতম ন্যায়ালয়ে কৈছিল, "আমি কোনো উমৈহতীয়া ৰেখা আঁকিব নালাগে" ৷
অন্তৱৰ্তীকালীন জামিন প্ৰদান কৰাৰ সময়ত আদালতে কিছু চৰ্তও আৰোপ কৰিছিল । য’ত তেওঁক মুখ্যমন্ত্রীৰ কার্যালয়লৈ যোৱাত নিষেধাজ্ঞা আৰোপ কৰা হৈছিল ৷ 2 জুনত আত্মসমৰ্পণ কৰিব লাগিব অৰবিন্দ কেজৰিৱালে ।
উল্লেখ্য যে, অৰবিন্দ কেজৰিৱালক 2024 চনৰ 21 মাৰ্চত ইডিয়ে গ্ৰেপ্তাৰ কৰিছিল । তিহাৰ জেলত 50 দিনতকৈও অধিক সময় আৱদ্ধ হৈ আছিল দিল্লীৰ মুখ্যমন্ত্ৰীগৰাকী ।
