ریاست راجستھان کے سبھی اضلاع میں ٹرانسپورٹ دفتر کے باہر نجی بس مالکان کی جانب سے احتجاج کیا گیا۔ دارالحکومت جے پور میں 22 گودام سرکل پر واقع ٹرانسپورٹ دفتر کے باہر نجی بس مالکان اپنی بسیں لے کر پہنچے اور یہاں پر چکا جام کر دیا۔ ٹرانسپورٹ وزیر اور محکمہ کے اعلی افسران اور ریاستی حکومت کے خلاف جم کر نعرے بازی بھی کی گئی۔
نجی بس مالکان کی جانب سے کہا گیا ہے کہ جب تک ٹیکس معاف نہیں کیا جاتا ہے تب تک غیر معینہ احتجاج جاری رہے گا۔
پرائیویٹ بس ایسوسی ایشن تنظیم کے صدر اشوک کسوٹ نے بتایا کہ گذشتہ 6 روز قبل دارالحکومت جے پور میں وزیر اور دیگر محکمہ کے اعلیٰ افسران کے ساتھ ہماری میٹنگ ہوئی تھی۔ اس میٹنگ میں یہ طے ہوا تھا کہ ہم جلد ہی آپ کا ٹیکس معاف کر دیں گے۔ لیکن کسی طرح سے کوئی بھی ٹیکس معاف نہیں کیا گیا۔ اس وجہ سے آج ہمیں مجبوراً احتجاج کا اعلان کرنا پڑا ہے اور جب تک ہمارے مطالبات کو حکومت نہیں مان لیتی ہے تب تک ہم اسی طرح سے یہ احتجاج جاری رکھیں گے۔
اشوک نے بتایا کی ریاست راجستھان میں جو مرکزی حکومت کی جانب سے ایڈوائزری جاری کی گئی ہے اس کا بھی خیال نہیں رکھا جا رہا ہے اور ہمیں ہمارا حق نہیں دیا جا رہا ہے۔
واضح رہے کہ لاک ڈاؤن کے درمیان جو پریشانی نجی بس مالکان کے سامنے آرہی تھی اس کو لے کر ای ٹی وی بھارت کی جانب سے خبر بھی شائع کی گئی تھی۔
