الیکشن کمیشن کا سنجے سنگھ کو نوٹس

عاپ کے راجیہ سبھا رکن سنجے سنگھ کو یہ نوٹس ان کے دو فروری کے اس متنازعہ بیان پردیا گیا جس میں انہوں نے بھارتیہ جنتا پارٹی پرہنگامہ کرانے کی تیاری کا الزام لگایا تھا۔ بی جے پی نے اس بیان پر 'الیکشن کمیشن' میں شکایت کی تھی۔

عام آدمی پارٹی کے رکن پارلیمان سنجے سنگھ کو الیکشن کمیشن نے ان کے قابل اعتراض بیان پر نوٹس جاری کیاہے۔

راجیہ سبھا کے رکن سنجے سنگھ کو یہ نوٹس ان کے دو فروری کے اس متنازعہ بیان پردیا گیا جس میں انہوں نے بھارتیہ جنتا پارٹی پر ہنگامہ کرانے کی تیاری کا الزام لگایا تھا۔ بی جے پی نے اس بیان پر الیکشن کمیشن میں شکایت کی تھی۔

کمیشن نے سنجے سنگھ کو نوٹس جاری کرتے ہوئے 7 فروری 12 بجے تک جواب مانگا ہے۔

دہلی اسمبلی کی 70سیٹوں کے لئے 8 فروری کو پولنگ ہونی ہے اور آج شام 6 بجے انتخابی تشہیر ختم ہوجائے گی۔

سنجے سنگھ نے 2 فروری کو اندیشہ ظاہر کیا تھا کہ شاہین باغ اور جامعہ ملیہ اسلامیہ علاقے میں بڑا جھگڑا ہوسکتا ہے۔ انہوں نے کہاکہ وہ دہلی کے لوگوں اور الیکشن کمیشن کو پہلے سے ہی اس بارے میں ہوشیارکرنا چاہتے ہیں۔

رکن پارلیمان نے کہا تھا کہ بی جے پی دہلی اسمبلی انتخابات میں شکست کے خوف سے بوکھلائی ہوئی ہے اور دو فروری کو شاہین باغ میں کوئی بڑا ہنگامہ کرانا چاہتی ہے۔

خیال رہے کہ شاہین باغ میں شہریت ترمیمی قانون (سی اے اے) کی مخالفت میں گزشتہ پچاس دنوں سے زیادہ وقت سے مظاہرہ چل رہا ہے۔ شاہین باغ میں چل رہے مظاہرہ پر سیاسی جماعتیں ایک دوسرے پر الزام جوابی الزام لگانے میں پیچھے نہیں ہیں۔