ہجومی تشدد اور مسلمانوں پر جاری حملے کے حوالے سے راہل گاندھی اور اکھلیش یادو پر تنقید - syed sarwar Chishti Reaction

اجمیر درگاہ گدی ینشین سید سرور چشتی نے ملک میں ہجومی تشدد اور مسلمانوں پر جاری حملے کو لے کر راہل گاندھی اور اکھلیش یادو کو نشانہ بناتے ہوئے کہا کہ ان دونوں رہنماوں سے بڑی امیدیں ہیں لیکن ان کی زبانیں کیوں خاموش ہیں۔ آخر ملک کے مسلمان کب تک ظلم سہیں گے اور کیوں کسی کا ووٹ وبینک بنے رہیں گے۔

اجمیر: ملک میں این ڈی اے حکومت کے سامنے مضبوط اپوزیشن جماعتوں کو عوام کی مکمل حمایت حاصل ہے۔ ملک کی مختلف ریاستوں میں مسلمانوں پر ظلم اور ہجومی تشدد کا سلسلہ اب بھی تھمنے کا نام نہیں لے رہا ہے یہ باتیں اجمیر شریف درگاہ کے گدی نشین سید سرور چشتی نے کہی ۔

سرور چشتی نے راہل گاندھی اور اکھلیش پر طنز کرتے ہوئے کہا ہے کہ 4 جون کے بعد سے ان دونوں لیڈروں نے مسلمانوں پر ہونے والے ہجومی تشدد اور ظلم پر ابھی تک کیوں نہیں کچھ کہا۔ ملک کے آئین کو بچانے کے لیے اقلیتوں نے بہت سنجیدگی سے اپنے ووٹ کا استعمال کیا ہے۔ مختلف پارٹیوں پر مبنی انڈیا اتحاد کو بھاری تعداد میں ووٹ دیا گیا ہے۔

سرور چشتی نے مزید کہا کہ لیکن راہل گاندھی اور اکھلیش یادو ہجومی تشدد پر خاموش کیوں ہیں؟ اب ایسے حالات میں ایسا لگتا ہے کہ ہمیں اپنے اعمال اور صفوں کو درست کرنا ہوگا اور صوفی درگاہ خانقاہ کے ذمہ داران اور 24 مسلم ارکان پارلیمنٹ اور ملک بھر کے مسلم قائدین کو ایک ساتھ بیٹھ کر ظلم کے خلاف آواز اٹھانی ہوگی۔

قابل ذکر ہے کہ سرور چشتی ہمیشہ ملک کے مسلمانوں کے حق میں آواز بلند کرتے رہے ہیں۔ ایسے میں ان کا نشانہ ہمیشہ سے بی جے پی، آر ایس ایس، مودی، یوگی رہے ہیں، لیکن اب اقلیتوں پر مظالم پر ان کا غصہ کانگریس اور سماج وادی پارٹی پر نکل آیا ہے۔