وشال گڑھ مسلم مخالف تشدد معاملے میں مجرموں کے خلاف سخت کارروائی کی جائے: اسلم شیخ - Kolhapur Vishalgad Violence

سینئر مسلم اراکین اسمبلی اسلم شیخ اور امین پٹیل نے مطالبہ کیا ہے کہ وشال گڑھ مسلم مخالف تشدد معاملے میں مجرموں کے خلاف سخت کارروائی کی جائے۔

ممبئی:مہاراشٹر کے کولہاپور شہر میں واقع وشال گڑھ میں مسلمانوں کے مکانات اور مسجد پر شر پسندوں کے حملے کو لےکر کانگریس کے سینئر مسلم اراکین اسمبلی اسلم شیخ اور امین پٹیل نے ریاست کی ڈائریکٹر جنرل آف پولیس رشمی شکلا سمیت اعلیٰ سرکاری افسران سے ملاقات کی اور خاطیوں کے خلاف سخت کارروائی کا مطالبہ کیا۔

ریاستی پولیس کے صدر دفتر میں ڈائریکٹر جنرل آف پولیس رشمی شکلا سے ملاقات کے بعد میڈیا کے نمائندوں سے بات کرتے ہوئے اسلم شیخ نے کہا کہ وشال گڑھ میں ہونا والا تشدد ریاستی حکومت کی ناکامی ہے اور اس تشدد کے معاملے میں قصورواروں کے خلاف سخت کارروائی کی جانی چاہیے۔ غیر قانونی تعمیرات کو گرانے کے قواعد و ضوابط ہیں۔ اُنہوں نے سابق رکن پارلیمنٹ اُدین راجن بھوسلے پر تنقید کرتے ہوئے کہا کہ ایک الیکشن ہارنے کے بعد اتنی بڑی محنت کرنے کی کیا ضرورت ہے۔

اسلم شیخ نے مزید کہا کہ پوری دنیا چھترپتی شیواجی مہاراج سے تحریک لیتی ہے۔ چھترپتی شیواجی مہاراج نے تمام ذاتوں اور مذاہب کے لوگوں کو اپنے ساتھ لے کر حکومت کی۔ لیکن آج اسی شیورائے کی زمین پر خواتین پر ظلم ہو رہا ہے۔ پولیس کو مارا پیٹا جا رہا ہے۔ اسلم شیخ نے سوال کیا کہ اگر پولیس کے ساتھ ہی مارپیٹ اور بدسلوکی کی جائے گی تو عوام کس کی طرف دیکھیں گے؟ اُنہوں نے آخر میں کہا کہ جس مہاراشٹر نے ہمیشہ ملک کا نام روشن کیا ہے۔ آج اسی مہاراشٹر میں پولیس کے سامنے خواتین اور بچوں پر حملہ ہونا ترقی پسند مہاراشٹر کے لیے شرمناک ہے۔