گنگٹوک(سکم): سکم کے رانی پل علاقے میں سنیچر کی رات کو دودھ لے جا رہا ایک ٹینکر نے بے قابو ہونے کے بعد میلے میں بھیڑ کو روند ڈالا جس میں ایک پولیس اہلکار سمیت تین لوگوں کی موت ہو گئی۔ ٹینکر کے بھیڑ میں گھسنے کی وجہ سے تین لوگ گاڑی کے پہیوں کے نیچے آکر ہلاک ہوگئے۔ متعدد زخمی ہوئے جن میں سے کئی لوگوں کی حالت انتہائی تشویشناک ہے۔
سکم پولیس اور انتظامیہ کے مطابق یہ حادثہ ہفتہ کی رات تقریباً 8 بجے پیش آیا۔ سکم میں رانی پول کے قریب ایک میدان میں تمبولا میلہ لگا تھا۔ میلے کے بیچ دودھ لے جا رہا ایک ٹینکر بے قابو ہو گیا اور میلے میں گھس کر کئی لوگوں کو کچل دیا۔ اس حادثے میں تقریباً 20 لوگ زخمی ہوئے ہیں جن میں کئی لوگوں کی حالت تشویشناک بتائی جاتی ہے۔ معلوم ہوا ہے کہ ٹینکر سلی گڑی کی طرف جا رہا تھا۔ مقامی لوگوں نے بتایا کہ ٹینکر نے پہلے میلے کے میدان کے کنارے کھڑی تین چھوٹی چار پہیہ گاڑیوں کو ٹکر ماری، پھر وہ میلے میں لوگوں کے ہجوم میں گھس گیا۔ اس دوران بھیڑ پر تین کاریں چڑھ گئیں جس کی وجہ سے پورے میلے میں افراتفری مچ گئی۔