بین الاقوامی ٹورنامنٹ کے لیے منتخب ہونے پر شگوفی پروین کو اعزاز سے نوازا گیا - Shagufi Parveen honoured

بھاگلپور سے تعلق رکھنے والی کزا کراش کھلاڑی شگوفی پروین کے بین الاقوامی چیمپئن شپ کے لیے منتخب ہونے پر ہونہار کھلاڑی کے اعزاز میں ایک نشست کا انعقاد کیا گیا۔

بھاگلپور : ریاست بہار کے بھاگلپور شہر سے تعلق رکھنے والی کزا کراش کھلاڑی شگوفی پروین کے اعزاز میں شاہینہ ایجوکیشن ٹرسٹ کی طرف سے ایک اعزازی محفل کا انعقاد کیا گیا۔ جس میں اس ہونہار کھلاڑی کو کزا کراش کے بین الاقوامی چیمپئن شپ کے لیے منتخب کیے جانے پر مبارک باد دی گئی اور گلپوشی کی گئی ساتھ ہی انہیں شال پیش کرتے ہوئے بین الاقوامی ٹورنامنٹ میں بہتر کارکردگی کے لیے نیک خواہشات کا اظہار کیا گیا۔

ایک معمولی گھرانے سے تعلق رکھنے والی شگوفی پروین کا انتخاب اگلے مہینے قزاقستان میں ہونے والے بین الاقومی چیمپئن شپ کے لیے کزا کراش کھیل میں ہوا ہے۔ اور شگوفی پروین بہار کی اکلوتی کھلاڑی ہیں جنہیں اس ٹورنامنٹ کے لیے منتخب کیا گیا ہے۔ اس موقع پر شگوفی پروین اور ان کے کوچ کندن کمار نے کہا کہ وہ شہر اور ملک کا نام روشن کرنے کے لیے پوری محنت کر رہی ہیں۔

مقامی لوگ شگوفی پروین کے اس کامیابی پر بیحد خوش ہیں کہ ناکافی سہولیات اور مالی دشواریوں کے باوجود شگوفی نے یہ کارنامہ انجام دیا ہے۔ اس موقع پر شگوفی پروین نے بھاگلپور ایتھلیٹکس اسوسی ایشن کے صدر اور دیگر لوگوں کا شکریہ ادا کیا، جنہوں نے اس بین الاقوامی ٹورنامنٹ میں حصہ لینے کے لیے آنے والے مالی اخراجات میں ان کا تعاون کیا۔