انتخابی تشہیری مہم میں انڈیا اتحاد اور این ڈی اے کے درمیانن برتری کا مقابلہ - Lok Sabha Election 2024

India Alliance In Gaya گیا میں پارلیمانی انتخابات کے تحت انڈیا اتحاد کے بہ نسبت این ڈی اے اتحاد کے مرکزی سطح کے معروف بڑے رہنماوں نے انتخابی تشہیر میں حصہ لیا۔ جبکہ انڈیا اتحاد میں صرف آرجے ڈی کے رہنماوں نے انتخابی تشہیری مہم میں حصہ لیا۔

گیا:پہلے مرحلے کے تحت آج انتخابی تشہیری مہم ختم گئی۔ انتخاب کی تاریخ کے اعلان کے بعد یہاں گیا پارلیمانی حلقہ سمیت بہار کی ان سبھی حلقوں جن میں نوادہ، اورنگ آباد اور جموئی شامل ہے وہاں تشہیری مہم زبردست طریقے سے ہوئی، انڈیا اتحاد بمقابلہ این ڈی اے اتحاد کے اُمیدواروں کے درمیان مقابلہ ہے اور اس دوران دونوں اُمیدواروں کے حق میں بڑے رہنماؤں کی ریلی اور جلسے ہوئے لیکن تشہیر کے معاملے میں این ڈی اے اُمیدواروں نے سبقت حاصل کی۔

ان کے لیے انتخابی جلسے کو خطاب کرنے کے لیے وزیر اعظم نریندر مودی، وزیر داخلہ امیت شاہ، وزیر اعلی نتیش کمار، اتر پردیش کے وزیر اعلی یوگی ادتیہ ناتھ ، لوجپا کے رہنماء چراغ پاسوان اور مرکزی وزیر پشو پتی پارس سمیت کئی اور وزراء اور ریاستی و قومی سطح کے رہنماؤں کی آمد ہوئی۔ انہوں نے این ڈی اے کے امیدواروں کے حق میں ووٹ مانگے۔

گیا پارلیمانی حلقہ میں این ڈی اے کے امیدوار جیتن رام مانجھی کے حق میں بھی این ڈی اے کے سبھی بڑے رہنماوں بالخصوص وزیراعظم اور وزہر اعلی نتیش کمار، وزیرداخلہ امیت شاہ ووٹ مانگنے پہنچے لیکن دیگر نشستوں کی طرح ہی گیا پارلیمانی نشست میں انڈیا اتحاد سے آر جے ڈی کے اُمیدوار کمار سر و جیت کے لئے آر جے ڈی کے رہنماؤں کے علاوہ اتحاد کا کوئی بڑا رہنماء تشہیری مہم میں شامل نہیں ہوا۔

آر جے ڈی کے اُمیدوار کے لئے صرف سابق نائب وزیراعلی تیجسوی یادو اور وی آئی پی پارٹی کے قومی صدر مکیش سہنی ، آر جے ڈی کے سابق ریاستی وزیر عبد الباری صدیقی اور دیگر مقامی رہنماء آئے لیکن اتحاد میں شامل کانگریس پارٹی کے نا تو ریاستی صدر اکھلیش سنگھ، سابق قومی صدر راہل گاندھی، پرینکا گاندھی، قومی صدر ملکا ارجن کھڑکے سمیت بائیں بازو کی جماعتوں کا کوئی بھی ملکی سطح کا بڑا رہنماء شامل نہیں ہوا۔ اُنہیں آر جے ڈی نے مدعو نہیں کیا یا پھر اتحاد کی دوسری پارٹیوں کی اعلی قیادت نے دلچسپی نہیں لی؟ یہ ان کا سیاسی لائحہ عمل تھا یا کوئی اور معاملہ تھا۔

ان سب سوالوں پر کانگریس کے سنئیر رہنماء محمد موسی نے کہا کہ یہ مرکز کا انتخاب ہے۔ اس میں براہ راست مقابلہ این ڈی اے بنام انڈیا اتحاد ہے۔ ان دونوں اتحاد کا اپنا سیاسی نظریہ ہے اور اپنے ووٹر ہیں۔ گیا پارلیمانی حلقہ کے امیدوار کمار سروجیت کا سیاسی بیک گراونڈ مضبوط ہے۔ اس وجہ سے انڈیا اتحاد ایک میسج تھا کہ یہاں کا انڈیا اتحاد کا امیدوار سیاسی طور پر خود مضبوط ہے۔

وزیر رہتے ہوئے انکی کارکردگی متاثرکن ہے۔ یہاں انڈیا اتحاد کے مقامی رہنما جن میں ڈاکٹر سریندر یادو سابق ریاستی وزیر، رکن اسمبلی نہال الدین احمد سمیت کئی رہنما اور کارکنان متحر ہیں۔ دوسری اہم بات یہ ہے کہ یہاں بہار میں انڈیا اتحاد میں آرجے ڈی رہنماء تیجسوی یادو خود متحرک ہیں اور عوام سے انکا رابطہ اچھے ڈھنگ سے ہوتا ہے۔

سیاسی جلسوں کو خطاب کرنے کے لیے انکی مانگ ہے اس وجہ سے یہاں انڈیا اتحاد کو تشہیرکو لیکر زیادہ کوئی لائحہ عمل تیار کرنے کی ضرورت نہیں تھی۔ بہار کے بقیہ اور جگہوں پر انڈیا اتحاد کے اعلی رہنماوں کی آمد ہوگی اور پرزور طریقے سے تشہیر ہوگی۔

واضح ہوکہ گیا پارلیمانی حلقہ 6 اسمبلی حلقوں کے دائرے پر مشتمل ہے۔ یہاں گیا پارلیمانی حلقہ سے کل 14 امیدوار قسمت آزما رہے ہیں جس میں این ڈی اے اور انڈیا اتحاد کے امیدوار بھی شامل ہیں۔ گیا پارلیمانی حلقہ میں 18 لاکھ 36 ہزار کے قریب ووٹر ہیں جس میں ساڑھے نولاکھ کے قریب مرد ووٹر اور ساڑھے آٹھ لاکھ کے قریب خاتون ووٹر ہیں۔ گیا میں پہلے مرحلے میں ووٹنگ 19 اپریل کو ہونی ہے اور آج انتخابی تشہیری مہم کا آخری دن تھا