مسلم لیجسلیچرز فورم نے بنگلور سنٹرل میں منصور علی خان کی شکست کا جائزہ لیا - REASON FOR MANSOOR ALI KHANs DEFEAT

مسلم لیجسلیچرز فورم نے بنگلور سنٹرل میں منصور علی خان کی شکست کا جائزہ لیا۔ بی جے پی کی فرقہ وارانہ سیاست کو شکست کی وجہ بتائی گئی۔

بنگلور: منصور علی خان، کانگریس کی جانب سے کرناٹک میں واحد مسلم امیدوار تھے۔جنہیں بنگلور سینٹرل حلقے سے ٹکٹ دی گئی تھی اور پارلیمانی انتخاباتمیں انہوں نے بی جے پی کے خلاف سخت مقابلہ کیا لیکن تقریباً 30 ہزار ووٹوں سے ناکام رہے۔

اس سلسلے میں مسلم لیجسلیچرز فورم کی ایک خصوصی میٹنگ میں جائزہ لیا گیا کہ عوام کی حمایت کے ساتھ ووٹنگ کے باوجود منصور علی خان کو شکست کیسے ہوئی۔

لیجسلیچرز فورم کے اجلاس کے بعد میڈیا سے بات کرتے ہوئے ایم ایل سی و وزیر اعلیٰ کے سیکرٹری نصیر احمد اور ایم ایل سی و کرناٹک کانگریس کے ورکنگ پریسیڈنت سلیم احمد نے نہایت افسوس کا اظہار کرتے ہوئے کہا کہ منصور علی خان کی شکست بی جے پی کی گہری تقسیم پالیسی زہرگھولنے کے فارمولے کا نتیجہ ہے۔

نصیر احمد نے مطالبہ کیا کہ بنگلور سینٹرل کے مہادیو پورا حلقے میں جو بڑی شکست ہوئی ہے اس کے متعلق تفتیش ہونی چاہیے کہ آخر منصور خان یہاں کن وجوہات کے بنا پر پیچھے رہے۔

جب کہ اس سلسلے میں منصور علی خان نے کہا کہ اب وہ کسی ایم ایل اے یا وزیر پر اپنی شکست کا الزام عائد نہیں کرنا چاہتے اور مزید بتایا کہ کانگریس ہائی کمان کی جانب سے کرناٹک میں پارٹی کی شکست کی وجوہات کے متعلق ایک انٹرنل انالیسس جاری ہے۔