گیا میں کشیدگی پیدا کرنے کی غرض سے مزار اور کربلا کو شرپسندوں نے نقصان پہنچایا - Tension in Gaya

Shrines Damaged in Gaya: گیا میں ایک مذہبی مقام ' کربلا اور مزار ' کے احاطہ کے ایک چھوٹے حصہ کو بدمعاشوں نے نقصان پہنچایا ہے، اطلاع ملنے پر موقع پر پہنچی پولیس نے ایک شخص کو گرفتار بھی کیا ہے۔ ایس ایس پی نے کہا کہ حالات معمول پر ہیں تاہم احتیاط کے طور پر پولیس جوانوں کی تعیناتی ہے چونکہ آج رام نومی ہے اور رام نومی کا جلوس نکلنے والا ہے اس لیے خاص نگاہ ہے۔

گیا:ضلع گیا کے بیلا گنج تھانہ علاقہ کے بیلاگنج پڑاؤ کے نزدیک واقع ایک مذہبی مقام کو شر پسند عناصروں نے نقصان پہنچانے کی غرض سے اس کے کچھ حصہ کو توڑ نےکی کوشش کی ہے۔ معاملہ طول نہیں پکڑے اس کو لے کر مقامی لوگوں نے دانشمندی کا ثبوت پیش کرتے ہوئے اس کی اطلاع فوری طور پر پولیس کو دی۔ جس کے بعد موقع پر پولیس پہنچی اور پورے حالات کا جائزہ لیا۔ ایس ایس پی آشیش بھارتی نے بتایا کہ مقامی تھانے کو اس کی اطلاع ملنے کے بعد تھانہ انچارج کی طرف سے انہیں فوری طور پر اطلاع دی گئی۔ جس کے بعد ان کی ہدایت پر لاء اینڈ آرڈر ڈی ایس پی خورشید عالم کو موقع پر بھیجا گیا۔ ڈی ایس پی خورشید عالم نے بتایا کہ موقع پر جب وہ پہنچے تو پایا کہ ایک مذہبی مقام کی دیوار ٹوٹی ہوئی ہے اور اس کے اندر کے حصہ کو بھی نقصان پہنچایا گیا ہے، پورے معاملہ کی تفتیش کی گئی ، کچھ لوگوں کی پہچان بھی کی گئی ہے۔ اس میں ایک شخص کو گرفتار بھی کیا گیا ہے اور اس سے پوچھ تاچھ کی گئی ہے۔

انہوں نے کہا کہ معاملہ کو سنجیدگی سے خود ایس ایس پی نے لیا ہے اور انکی ہدایت پر علاقے میں پولیس کی جانب سے فلیگ مارچ کیا گیا اور ساتھ ہی احتیاط کے طور پر پولیس جوانوں کی تعیناتی کی گئی ہے۔ حالات معمول پر ہیں تاہم پھر بھی پولیس محتاط ہے۔ انہوں نے کہا کہ ایک مشکوک شخص کو گرفتار کیا گیا ہے۔ آگے کی کارروائی جاری ہے اور لوگوں سے پرسکون رہنے کی اپیل کی گئی ہے۔ کوئی بھی بخشا نہیں جائے گا۔ موقع پر موجود بلاک سرکل آفیسر سے کہا گیا ہے کہ وہ نقصان جو ہوا ہے اس کا اندازہ لگا کر کام کروائیں۔