بنگلہ دیش میں میڈیکل کی پڑھائی کر رہے طلباء بحفاظت مرادآباد واپس لوٹے - Indian Students In Bangladesh

بنگلہ دیش میں سرکاری ملازمتوں میں کوٹہ کے خلاف طلباء نے پرتشدد مظاہرہ کیا جس میں کئی لوگوں کی جان چلی گئی۔ ہندوستان سے تعلیم حاصل کرنے کے لیے بنگلہ دیش گئے طلباء کو واپس لایا جا رہا ہے مرادآباد کے بھی کئی طلبہ و طالبات باحفاظت اپنے گھر پہنچ گئے ہیں

مرادآباد:بنگلہ دیش میں طلباء اور پولیس کے بیچ تصادم اور پرتشدد مظاہروں کے درمیان وہاں سے ہندستانی طلباء اور طالبات کو ملک واپس لانے کا سلسلہ جاری ہے۔ مرادآباد سے بنگلہ دیش میڈیکل کی پڑھائی کرنے گئے طلباء و طالبات باحفاظت آج مرادآباد پہنچ گئے ہیں۔ واضح رہے کہ بنگلہ دیش میں سرکاری ملازمتوں میں کوٹہ کی مخالفت کو لے پولیس اور طلباء کے مابین گزشتہ کئی دنوں سے تشدد جاری ہے اور ان پرتشدد مظاہروں میں سینکڑوں لوگوں کو اپنی جان گنوانی پڑی۔

تصادم کی لپٹوں میں گھرے بنگلہ دیش سے اپنے وطن لوٹنے پر طلباء کے چہروں پر خوشی صاف نظر آئی۔مظاہروں کی بابت ذکر کرتے ہوئے بنگلہ دیش کے کھلنا میں غازی میڈیکل کالج کی ایم بی بی ایس کی طالبہ صنا نے بتایا کہ وہاں کے حالات بہت خراب تھے۔ کئی لوگ ان مظاہروں میں مارے گئے۔ ہم بھی خوف کے سائے میں وہاں پر جی رہے تھے۔ انہوںنے کہاکہ ہر طرف آگ زنی، توڑ پھوڑ اور بد امنی کے نظارے تھے۔ انٹرنیٹ کو پوری طرح بند کر دیا گیا تھا اور ہر جگہ کرفیو لگا ہوا تھا ایسے میں گھر والوں سے بھی بہت بات نہیں ہو پا رہی تھی۔ حالانکہ کسی طرح انڈین ایمبیسی سے ہماری بات چیت ہو پائی اور انہوں نے ہمیں سہارا دیا۔

ایم بی بی ایس کی دوسرے سال کی طالبہ مسکان ملک نے ای ٹی وی سے بات کرتے ہوئے بتایا کہ انہیں بہت زیادہ ڈر لگ رہا تھا حالانکہ ان کو ایک ہاسٹل میں رکھا گیا تھا مگر حالات بہت خراب تھے۔ پہلے کالج انتظامیہ نے انہیں گھر بھیجنے سے صاف انکار کر دیا تھا مگر کچھ سینیئر طلباء نے اپنی بات کالج انتظامیہ اور ہندوستانی سفارت خانے تک پہنچائی۔

وہیں اس معاملے پر معلومات دیتے ہوئے مرادآباد کے ڈسٹرکٹ میجسٹریٹ انوج سنگھ نے بتایا کہ ہندوستانی کی وزارت خارجہ اور بنگلہ دیشی حکومت کی کوششوں سے بنگلہ دیش میں پڑھائی کر رہے ہیں طلباء و طالبات کو ہندوستان لایا گیا ہے۔اس میں مرادآباد کے بھی کچھ بچے شامل تھے جو اب اپنے گھر پہنچ گئے ہیں ۔