کامن ویلتھ گیمز میں تمغہ جیتنے والی ویٹ لفٹر کے ساتھ چھیڑ چھاڑ، مخالفت کرنے پر ملزمین نے کیا لہولہان - International Player Beaten

اترپردیش کے دارالحکومت لکھنؤ میں بین الاقوامی ویٹ لفٹنگ کھلاڑی کے ساتھ چھیڑ چھاڑ اور مارپیٹ کا معاملہ سامنے آیا ہے۔ وہیں پولیس کا کہنا ہے کہ یہ روڈ ریج کا معاملہ ہے۔ فی الحال پولیس تفتیش کر رہی ہے۔

لکھنؤ: دارالحکومت میں کامن ویلتھ گیمز میں کانسے کا تمغہ جیتنے والی ویٹ لفٹر کے ساتھ ہولی کے دن چھیڑ چھاڑ کا واقعہ پیش آیا۔ یہی نہیں جب خاتون کھلاڑی نے چھیڑ چھاڑ کی مخالفت کی تو ملزمین نے اسے اور اس کے کھلاڑی دوستوں کی بری طرح سے پٹائی کی۔ سوشانت گولف سٹی پولیس اسٹیشن انچارج انجنی مشرا کے مطابق گاڑی کی ٹکر سے خاتون کھلاڑی اور ملزمین کے درمیان لڑائی ہوئی۔ خاتون کھلاڑی اور دوسرے فریق کی شکایت کی بنیاد پر مقدمہ درج کر لیا گیا ہے۔ جانچ جاری ہے۔

دارالحکومت کے سوشانت گالف سٹی کی رہائشی بین الاقوامی ویٹ لفٹر کے مطابق 25 مارچ کو ہولی کے دن وہ اپنے دو اسپورٹس پرسن دوستوں کے ساتھ ڈالی گنج میں اپنے خاندان کے لوگوں سے ملنے جا رہی تھی۔ اس دوران اس نے اپنی گاڑی ایک دکان پر کھڑی کی اور چائے پینے لگی۔ اس دوران تھار میں سوار کچھ نوجوانوں نے اس پر فحش تبصرے کرنا شروع دیے۔ اس نے اور اس کے دوستوں نے مخالفت کی تو تھار میں سوار نوجوانوں نے مارپیٹ شروع کر دی۔

خاتون کھلاڑی کے مطابق تھار میں سوار نوجوانوں نے چھیڑ چھاڑ کی مخالفت کرنے پر اسے بری طرح زدوکوب کیا۔ یہی نہیں، اس کے دوستوں کو بھی مارا پیٹا گیا۔ خاتون کھلاڑی نے بتایا کہ اس نے کامن ویلتھ گیمز میں کانسے کا تمغہ جیتا ہے۔ اس کے علاوہ انہیں یوپی میں کھلاڑیوں کا سب سے بڑا اعزاز رانی لکشمی بائی ایوارڈ سے بھی نوازا گیا ہے۔ سوشانت گولف سٹی کے انسپکٹر انجنی کمار مشرا نے کہا کہ معاملہ روڈ ریج کا تھا جس کے بعد دونوں فریق میں لڑائی ہو گئی۔ فریقین کی شکایت پر مقدمہ درج کر کے تفتیش شروع کر دی گئی ہے۔ تحقیقات میں جو بھی حقائق سامنے آئیں گے اس کے مطابق قانونی کارروائی کی جائے گی۔