Published : Aug 16, 2024, 4:36 PM IST
نئی دہلی: ممبئی میں مشال اسپورٹس کے زیر اہتمام پرو کبڈی لیگ (پی کے ایل) سیزن 11 کے لیے کھلاڑیوں کی نیلامی کے پہلے ہی دن سچن سب سے مہنگے فروخت ہونے والے کھلاڑی بن گئے۔ انہیں تمل تھلائیواس نے 2.15 کروڑ روپے میں خریدا۔
دریں اثنا محمدرضا شادلوئی چیانہ پرو کبڈی لیگ کے کھلاڑیوں کی نیلامی میں سب سے مہنگے غیر ملکی کھلاڑی کے طور پر ابھرے ہیں، انھیں ہریانہ اسٹیلرز نے 2.07 کروڑ روپے میں خریدا۔ وہ نیلامی میں 2 کروڑ روپے سے زائد میں خریدے جانے والے پہلے غیر ملکی کھلاڑی بھی بن گئے ہیں۔
واضح رہے کہ نیلامی کے پہلے دن 12 فرنچائز ٹیموں کو کل 20 کھلاڑی فروخت کیے گئے، جس میں پہلے دن تین فائنل بڈ میچ (ایف بی ایم) کارڈ استعمال کیے گئے۔ بنگال واریئرز، تیلگو ٹائٹنز اور گجرات جائنٹس نے بالترتیب منیندر سنگھ، پون سہراوت اور سومبیر کے لیے ایف بی ایم کارڈز کا استعمال کیا۔
کھلاڑیوں کی اس نیلامی میں پی کے ایل کی تاریخ میں ریکارڈ تعداد میں کھلاڑی ایک کروڑ کلب میں شامل ہوئے۔ آج کی نیلامی میں سچن، محمدرضا شادلوئی، گومان سنگھ، پون سہراوت، بھرت، منیندر سنگھ، اجنکیا پوار اور سنیل کمار ایک کروڑ روپے کے کلب کا حصہ تھے۔
