سیاحوں کا سرینگر جموں ریل پروجیکٹ جلد مکمل کرنے کا مطالبہ

Train services continue despite snowfall in kashmirموسمی خرابی کے پیش نظر سرینگر جموں شاہراہ پر ٹریفک کی نقل و حمل بند کیے جانے سے کئی سیاح وادی میں درماندہ ہیں، درماندہ سیاحوں نے سرینگر جموں ریل خدمات کو فوری طور مکمل کرنے کا مطالبہ کیا ہے، تاکہ کسی بھی موسمی صورتحال کے دوران مسافرین کو دقتوں کا سامنا نہ کرنا پڑے۔

اننت ناگ (جموں کشمیر) :سرینگر جموں قومی شاہراہ پر اکثر و بیشتر زمین کھسکنے، چٹانیں گر آنے کے واقعات پیش آتے رہتے ہیں جس کی وجہ سے سرینگر جموں قومی شاہراہ گاڑیوں کی آمد و رفت کے لیے بند کی جاتی ہے۔ سرینگر - جموں شاہراہ کے علاوہ شوپیاں - پونچھ،راجوری روڈ اور سرینگر لیہہ سڑک کے علاوہ دیگر شاہراہیں بھی عارضی طور بند کی جاتی ہیں، وہیں برفباری کے دوران ٹریک خدمات جاری رہتی ہے، کشمیر میں گزشتہ دنوں ہوئی برفباری کے باوجود بارہمولہ - بانہال ریل خدمات جاری رہیں، وہیں مسافرین سمیت سیاحوں نے رام بن ضلع میں جاری ریل پروجیکٹ کو فوری طور پر مکمل کرنے کا مطالبہ کیا ہے تاکہ مسافرین ہر موسم میں سفر کو جاری رکھ سکیں۔

سرینگر جموں قومی شاہراہ پر ٹریفک معطل کیے جانے کے سبب اس شاہراہ پر سفر کرنے والے مسافروں، سیاحوں حتی کہ بعض اوقات یاتریوں کو بھی پریشانیوں کا سامنا کرنا پڑتا ہے۔ موسم سرما میں بھی بارشوں یا برفباری کی وجہ سے شاہراہ کو آئے روز ٹریفک کی آمد و رفت کے لئے بند کر دیا جاتا ہے جس نہ صرف کشمیر میں غذائی اجناس کی قلت کا اندیشہ رہتا ہے جبکہ یہاں آئے سیاحوں کو بھی کافی مشکلات درپیش رہتی ہیں۔ مسافر قومی شاہراہ کے بند ہونے کے بعد ریل کے ذریعے بانہال تک مسافت طے کرنے کو ترجیح دیتے ہیں، تاہم وہاں بھی انہیں بعض اوقات شاہراہ بند رہنے کے سبب انہیں واپس لوٹنا پڑتا ہے۔ مسافرین خاص کر سیاحوں نے سرینگر جموں ریل پروجیکٹ پر رکے پڑے کام کو فوری طور پر مکمل کرنے کا مطالبہ کیا ہے کہ تاکہ مسافرین بغیر پریشانی شاہراہ پر سفر کر سکیں۔

صوبہ جموں میں نویگا ٹنل کے آر پار مسلسل بارشوں اور برف باری کے نتیجے میں جہاں سرینگر جموں شاہراہ آج دوسرے روز بھی ٹریفک کی آمد و رفت کے لیے معطل رہی وہیں اس دوران بڑے پیمانے پر لوگ ریل گاڑی میں سفر کرتے نظر آئے۔ وادی کشمیر میں موسمی خرابی کے باوجود دن بھر بانہال اور بارہمولہ کے بیچ ریل خدمات جاری رہیں۔ جبکہ آج دن بھر ٹرین کے خوبصورت اور دلکش نظارے برف باری کے بیچ دیکھنے کو ملے اور بانہال اور بارہمولہ کے بیچ ریل گاڑی کی خدمات بلا خلل جاری رہیں۔

ادھر، قومی شاہراہ کے بند رہنے کے دوران لوگوں خاص کر درماندہ سیاحوں کی ایک خاصی تعداد نے ٹرین کے ذریعے ہی سفر کیا۔ سیاحوں نے حکومت سے مطالبہ کیا وہ جلد سے جلد جموں سے کشمیر تک ریل خدمات کو مکمل کریں تاکہ موسمی خرابی کے چلتے سیاحوں، یاتریوں یا مسافرین کو دقتوں کا سامنا نہ کرنا پڑے۔ واضح رہے کہ فی الوقت کشمیر میں ریل خدمات صرف شمالی کشمیر بارہمولہ ضلع سے بانہال تک ہی دستیاب ہیں جبکہ ادھمپور- بارہمولہ ریل پروجیکٹ کی تکمیل اپنے آخری مراحل میں ہے۔ اگلے چند ماہ میں اس پروجیکٹ کو مکمل کیے جانے کی امید ہے جس کے بعد کشمیر سے کنیا کماری تک ریل خدمات میسر ہوں گی جس سے سیاحتی و کاروباری صنعت کو فروغ ملے گا۔