جموں کشمیر انتخابات: محبوبہ مفتی نے حسن نصراللہ کے قتل کے خلاف احتجاجاً انتخابی مہم منسوخ کر دی - Mehbooba protest Nasrallah killing

جموں و کشمیر میں اسمبلی انتخابات کی مہم اپنے آخری مرحلے میں ہے۔ ادھر پی ڈی پی کی سربراہ محبوبہ مفتی نے حزب اللہ کے سربراہ نصراللہ کی ہلاکت کے خلاف احتجاجاً اپنی انتخابی مہم منسوخ کر دی۔ Mehbooba Mufti protest against Nasrallah Killing

سری نگر:پی ڈی پی کی سربراہ محبوبہ مفتی نے اتوار کو لبنان اور غزہ کے 'شہیدوں' کے ساتھ اظہار یکجہتی کے لیے جموں و کشمیر میں اسمبلی انتخابات 2024 کے آخری مرحلے کے لیے انتخابی مہم منسوخ کر دی۔ انہوں نے لبنان میں حزب اللہ کے سربراہ حسن نصر اللہ کے تئیں اپنی یکجہتی کا اظہار کیا۔

واضح رہے کہ حسن نصراللہ جمعہ کو اسرائیل کے فضائی حملے میں مارے گئے تھے۔ حزب اللہ نے ہفتے کے روز نصر اللہ کی ہلاکت کی تصدیق کی تھی۔ اس سے قبل اسرائیلی فوج نے حسن نصر اللہ کی ہلاکت کا دعویٰ کیا تھا۔ جموں و کشمیر کی سابق وزیر اعلیٰ مفتی نے آج اپنی انتخابی مہم کو منسوخ کرنے کا اعلان کرتے ہوئے کہا کہ ان کی پارٹی فلسطین اور لبنان کے لوگوں کے ساتھ کھڑی ہے۔

مفتی نے سوشل میڈیا پر کہا کہ ''لبنان اور غزہ کے شہداء بالخصوص حسن نصر اللہ کے ساتھ اظہار یکجہتی کے لیے میں کل اپنی مہم منسوخ کر رہی ہوں۔‘‘ دکھ کی اس گھڑی میں ہم فلسطین اور لبنان کے عوام اور مثالی مزاحمت کے ساتھ کھڑے ہیں۔''

وہیں اسرائیل کے حملے میں حسن نصر اللہ کی ہلاکت کے خلاف آج جموں و کشمیر کے کئی حصوں میں احتجاج کی کال دی گئی ہے۔ آپ کو بتا دیں کہ جموں و کشمیر میں اسمبلی انتخابات کے لیے ووٹنگ کا آخری مرحلہ یکم اکتوبر کو ہے۔ آخری مرحلے کے لیے انتخابی مہم زور و شور سے جاری ہے۔ یونین ٹیریٹری میں آخری مرحلے میں 40 سیٹوں پر ووٹنگ ہونی ہے۔

مشرق وسطی میں کشیدگی

حالیہ ہفتوں میں لبنان پر اسرائیل کے مسلسل اور شدید حملوں کی وجہ سے مشرق وسطیٰ جنگ کے دہانے پر ہے۔ ؤتین دہائیوں سے زائد عرصے تک حزب اللہ کی قیادت کرنے والے نصراللہ کے قتل کے بعد یہ تنازع ایک نیا موڑ لے سکتا ہے۔ جمعہ کو اسرائیل نے بیروت میں نصر اللہ کو نشانہ بنا کر اسرائیل نے بنکر بسٹر بموں سے شدید حملہ کیا۔

یہ اسرائیل کی طرف سے لبنان پر اب تک کا سب سے طاقتور حملہ تھا۔ لبنان سرحد پر تقریباً ایک سال سے غزہ کی جنگ کے ساتھ مسلسل جھڑپیں جاری ہیں۔ اس حملے کے بڑھنے سے یہ خدشہ بڑھ گیا ہے کہ تنازع قابو سے باہر ہو سکتا ہے اور اس میں حزب اللہ کا اہم حامی ایران اور امریکہ بھی ملوث ہو سکتا ہے۔