حیدرآباد: تلنگانہ حکومت نے سابق وزیر اعظم منموہن سنگھ کو بھارت رتن سے نوازنے کا مطالبہ کیا ہے۔ اس سلسلے میں تلنگانہ اسمبلی نے پیر کو متفقہ طور پر ایک قرارداد منظور کی، جس میں مرکزی حکومت سے آنجہانی ڈاکٹر منموہن سنگھ کو بھارت رتن سے نوازنے کی درخواست کی گئی ہے۔ اسمبلی نے متفقہ طور پر چیف منسٹر ریونت ریڈی کی پیش کردہ تجویز کو قبول کرلیا۔
اس کے علاوہ حیدرآباد میں منموہن سنگھ کا مجسمہ نصب کرنے کے لیے اسمبلی میں ایک قرار داد بھی پاس کی گئی، تاکہ انہیں ایک عظیم لیڈر کے طور پر یاد کیا جائے، جنہوں نے نئی ریاست دے کر تلنگانہ کے عوام کی 60 سالوں کی امنگوں کو پورا کیا۔ قرارداد میں کہا گیا کہ ان کا بطور وزیر خزانہ (1991-1996) دور ملک کی معاشی تاریخ کا ایک اہم موڑ تھا، جس میں لبرلائزیشن، نجکاری اور عالمگیریت جیسی بڑی اصلاحات دیکھنے میں آئیں۔
قبل ازیں اسمبلی کے خصوصی اجلاس میں آنجہانی سابق وزیر اعظم سنگھ کو خراج عقیدت پیش کیا گیا۔ نیز ہندوستان کی ترقی اور ریاست تلنگانہ کی تشکیل میں ان کی انمول شراکت کا اعتراف کیا گیا۔ منموہن سنگھ کو بین الاقوامی شہرت یافتہ ماہر اقتصادیات کے طور پر بیان کیا گیا تھا۔
ڈاکٹر منموہن سنگھ 2004-2014 تک وزیر اعظم رہے۔ ان کے دور میں، مہاتما گاندھی نیشنل رورل ایمپلائمنٹ گارنٹی ایکٹ (منریگا)، معلومات کا حق قانون، نیشنل رورل ہیلتھ مشن اور آدھار پروگرام شروع کیے گئے۔
قرارداد میں اس بات پر بھی زور دیا گیا کہ تلنگانہ ریاست کی تشکیل میں ڈاکٹر منموہن سنگھ کا اہم رول تھا۔ وزیر اعظم کے طور پر ان کے دور میں، آندھرا پردیش تنظیم نو کا ایکٹ 2014 میں پارلیمنٹ میں منظور کیا گیا تھا، جس نے لوگوں کی دہائیوں پرانی خواہش کو پورا کیا۔
منموہن سنگھ نے تلنگانہ کی تشکیل میں اہم کردار ادا کیا:
چیف منسٹر ریونت ریڈی نے کہا کہ ریاست کی تشکیل میں اہم رول ادا کرنے پر کہا ہم منموہن سنگھ کا شکر گزار ہیں۔ انہوں نے ملک کے عالمی وقار کو بڑھانے میں آنجہانی منموہن سنگھ کے وژن اور قیادت کو اجاگر کیا اور آنے والی نسلوں کے لیے رہنما کے طور پر ان کے اعزاز کی اہمیت پر زور دیا۔ سی ایم ریڈی نے یاد دلایا کہ تلنگانہ کے محبوب نگر سے ہی اس وقت کے وزیر اعظم منموہن سنگھ نے ایک سال میں 100 دن کا یقینی روزگار فراہم کرنے کے لیے منریگا اسکیم شروع کی تھی۔
روزگار کی گارنٹی اسکیم نے ملک کا رخ بدل دیا:
ساتھ ہی تلنگانہ کے نائب وزیر اعلی بھٹی وکرمارک نے بھی منموہن سنگھ کی ستائش کی اور لبرل پالیسیوں کے ذریعے ملک کی معیشت کو مضبوط بنانے میں ان کے کردار کو اجاگر کیا۔ انہوں نے کہا کہ ڈاکٹر منموہن سنگھ ہندوستان میں سماجی عدم مساوات کو سمجھتے تھے اور عام آدمی کو بااختیار بنانے کے لیے آر ٹی آئی جیسے قانون لائے تھے۔ انہوں نے کہا کہ منموہن سنگھ کی طرف سے شروع کی گئی روزگار گارنٹی اسکیم کا ملک پر تبدیلی کا اثر پڑا ہے۔
بی آر ایس نے بھارت رتن کے مطالبے کی حمایت کی:
تلنگانہ اسمبلی میں تمام جماعتوں کے ارکان نے منموہن سنگھ کو خراج عقیدت پیش کیا اور تلنگانہ کے ساتھ ان کے قریبی تعلقات کو یاد کیا۔ مرکزی اپوزیشن پارٹی بھارت راشٹرا سمیتی (بی آر ایس) نے بھی منموہن سنگھ کو بھارت رتن دینے کے مطالبے کی حمایت کی۔ بی آر ایس لیڈر کے ٹی راما راؤ (کے ٹی آر) نے کہا کہ ان کا ماننا ہے کہ منموہن سنگھ اعلیٰ ترین اعزاز کے مستحق ہیں۔ کے ٹی آر نے یاد دلایا کہ جب تلنگانہ کے فرزند پی وی نرسمہا راؤ وزیر اعظم تھے تو انہوں نے لیٹرل انٹری کے ذریعہ منموہن سنگھ کو حکومت میں شامل کیا تھا۔
