اقوام متحدہ نے انروا کے فنڈزجاری کرنے کی اپیل کی، امریکہ نے کہا پہلے تحقیقات کی جائے

UN Chief appealed for UNRWA funds اسرائیل کے خلاف حملوں میں حماس کی مدد کے الزام کا سامنا کر رہی انروا (UNRWA) کو فنڈز کی فوری طور پر ضرورت ہے۔ اقوام متحدہ کے سکریٹری جنرل نے بند کمرہ میں ڈونر ممالک سے اپیل کی۔ امریکہ نے انروا پر لگائے گئے الزامات کی تفصیلی جانچ کے بعد ہی فنڈز جاری کرنے کی بات کہی ہے۔

اقوام متحدہ: اقوام متحدہ کے سکریٹری جنرل انتونیو گوتریس نے 35 ڈونر ممالک کے ساتھ ایک رازدارانہ ملاقات کی اور فلسطینی پناہ گزینوں کے لیے اقوام متحدہ کی ایجنسی انروا کے لیے فنڈز کی بحالی کی اپیل کی۔

اقوام متحدہ کے سربراہ نے منگل کے روز یورپی یونین سمیت سفیروں کو انروا کے کچھ کارکنوں پر 7 اکتوبر کو اسرائیل پر ہوئے حملے میں حصہ لینے کے الزامات کے بعد کارکنوں کے خلاف کی گئی کارروائیوں سے آگاہ کیا۔

اقوام متحدہ میں فلسطینی سفیر ریاض منصور نے اجلاس کے بعد صحافیوں کو بتایا کہ سیکرٹری جنرل نے کئی ممالک سے اپیل کی ہے، جنہوں نے الزامات کے بعد یو این آر ڈبلیو اے کو دی جانے والی فنڈنگ روک دی تھی اور اس پر دوبارہ غور کرنے کی اپیل کی تھی اور دوسرے ممالک پر زور دیا تھا۔

منصور نے کہا کہ 7 اکتوبر سے غزہ میں اسرائیلی جارحیت میں انروا کے 153 کارکن ہلاک ہو چکے ہیں۔ دوسری جنگ عظیم کے بعد سے ایک آپریشن میں ہلاک ہونے والے اقوام متحدہ کے اہلکاروں کی یہ سب سے بڑی تعداد ہے۔ انھوں نے ڈونرز پر زور دیا کہ وہ ایسے اقدامات نہ اٹھائیں جو لاکھوں فلسطینی پناہ گزینوں کے خلاف اجتماعی سزا بن جائے۔ انہوں نے امداد معطل نہیں کرنے پر ناروے، اسپین اور دیگر کی تعریف کی۔

اقوام متحدہ کے ترجمان اسٹیفن دوجارک نے نامہ نگاروں کو بتایا کہ غزہ اور مشرق وسطیٰ میں انروا کے علاوہ کسی اور تنظیم کے پاس بنیادی ڈھانچہ نہیں ہے کہ وہ غزہ میں کیسے کام کرے۔ انھوں نے کہا کہ، یہ کسی بھی طرح ممکن نہیں ہے کہ اقوام متحدہ کی ایجنسی کو فوری طور پر تبدیل کیا جا سکے۔

دوجارک نے صحافیوں کو یہ بھی بتایا کہ ہر سال یو این آر ڈبلیو اے غزہ میں اپنے 13,000 عملے کی فہرست اسرائیل اور فلسطینی اتھارٹی کو فراہم کرتا ہے۔ "جہاں تک مجھے انروا کی طرف سے بتایا گیا ہے، جب عملے کی فہرست شیئر کی گئی ہے تو خدشات نہیں اٹھائے گئے۔

• تحقیقات کے بعد انروا کی فنڈز دوبارہ جاری کر سکتے ہیں: امریکہ

امریکی محکمہ خارجہ کا کہنا ہے کہ وہ فلسطینی پناہ گزینوں کی خدمت کرنے والی اقوام متحدہ کی ایجنسی کی مالی امداد دوبارہ شروع کرنے کی توقع رکھتا ہے بشرطیکہ وہ اپنے کچھ ملازمین اور حماس کے عسکریت پسند گروپ کے درمیان ممکنہ روابط کی معتبر تحقیقات کرے۔

بے گھر فلسطینیوں کو غزہ میں امداد فراہم کرنے والا انروا سب سے بڑا ادارہ ہے۔ امریکہ سب سے بڑا واحد عطیہ دہندہ ہے، جو 300 ملین ڈالر سے زیادہ، یا ایجنسی کے سالانہ بجٹ کا ایک چوتھائی حصہ دیتا ہے۔

محکمہ خارجہ میتھیو ملر نے منگل کو کہا کہ امریکہ نے آنے والے ہفتوں میں تقریباً 300,000 ڈالر بھیجنے کا منصوبہ بنایا ہے لیکن اس بارے میں کوئی تفصیلات نہیں بتائیں کہ فنڈنگ کب بحال ہو سکتی ہے۔

اسرائیل نے طویل عرصے سے دعویٰ کیا ہے کہ حماس ہتھیاروں کو ذخیرہ کرنے یا حملے شروع کرنے کے لیے انروا کی سہولیات کا استعمال کرتی ہے اور ایجنسی کے ملازمین اپنے اسکولوں میں اسرائیل کے خلاف نفرت کی تعلیم دیتے ہیں۔