نئی دہلی: دہلی کی مقامی عدالت نے بدھ کے روز وزیر اعلی اروند کیجریوال کو انفورسمنٹ ڈائریکٹوریٹ (ای ڈی) کی طرف سے مبینہ شراب پالیسی سے متعلق ایک معاملے میں مرکزی ایجنسی کے سمن کی تعمیل نہ کرنے کی شکایت پر سمن جاری کیا ہے۔ انفورسمنٹ ڈاائرکٹوریٹ کی شکایت سننے کے بعد جج نے اس کا نوٹس لیتے ہوئے عام آدمی پارٹی (اے اے پی) کے قومی کنوینر اور دہلی کے وزیراعلی اروند کیجریوال کے خلاف سمن جاری کرنے کا حکم دیا۔
انفورسمنٹ ڈائرکٹوریٹ نے دہلی کے وزیراعلی اروند کیجریوال کے خلاف مبینہ گھوٹالہ سے متعلق معاملے میں منی لانڈرنگ کی روک تھام ایکٹ (پی ایم ایل اے) کی دفعات کے تحت جاری سمن کی تعمیل نہ کرنے پر شکایت درج کی تھی۔ ایڈیشنل چیف میٹرو پولیٹن مجسٹریٹ دیویا ملہوترا نے ای ڈی کی شکایت کی سماعت کے بعد کہا کہ "شکایت کے مواد اور ریکارڈ پر رکھے گئے مواد سے بادی النظر میں تعزیرات ہند، 1860 اور ضابطہ فوجداری کی دفعہ 174 کے تحت جرم نظر آتا ہے۔ عام آدمی پارٹی کے سربراہ اروند کیجریوال کے خلاف 1973 کی دفعہ 204 کے تحت کارروائی آگے بڑھانے کے لیے کافی بنیادیں ہیں۔
مزید پڑھیں: سی ایم اروند کیجریوال کے گھر آج پھر پہنچی پولیس