سری نگر (محمد ذوالقرنین زلفی) : حکام نے پیر کو بتایا کہ، کھیلو انڈیا ونٹر گیمز (KIWG) کے پانچویں ایڈیشن کو ناکافی برف باری کی وجہ سے ملتوی کر دیا گیا ہے۔ ابتدائی طور پر یہ کھیل گلمرگ میں 22 سے 25 فروری 2025 تک ہونے والے تھے۔
جے اینڈ کے اسپورٹس کونسل کے ایک سینئر عہدیدار نے ای ٹی وی بھارت کو بتایا کہ، "یہ فیصلہ گلمرگ میں ناکافی برف باری کے پیش نظر کیا گیا ہے۔ برف باری کے حالات بہتر ہونے کے بعد ایک تازہ جائزہ لیا جائے گا، اور اس کے مطابق ایک نظرثانی شدہ شیڈول کا اعلان کیا جائے گا۔"
اہلکار نے مزید کہا کہ، "تکنیکی کمیٹی کے ساتھ مشاورت میں، اس تقریب کو ملتوی کرنے کا فیصلہ کیا گیا ہے، کیونکہ افروات اور باؤل کے اہم سکی سلوپس میں درکار برف نہیں ہے۔ اگلا فیصلہ 19 فروری کے بعد لیا جائے گا، کیونکہ محکمہ موسمیات نے موسم کی پیش گوئی کی ہے، جس میں گلمرگ میں تازہ برف باری ہونے کی توقع ہے۔"
یہ فیصلہ جموں و کشمیر حکومت کے اس بیان کے چند دن بعد آیا ہے جب ایونٹ کے لیے ہوٹل کی بکنگ، ایونٹ مینجمنٹ اور انفراسٹرکچر کی تیاری سمیت تمام لاجسٹک انتظامات کو احتیاط سے مکمل کر لیا گیا تھا۔
تقریباً 1,000 شرکاء جن میں 650 تکنیکی عملہ، مندوبین اور مقامی ایتھلیٹس شامل ہیں، اس تقریب میں شرکت کریں گے۔
