کانگریس کی گارنٹیاں: ہم وطنوں کی زندگیوں میں خوشحالی لانے کا عزم، راہل گاندھی

Congress Guarantees: راہل گاندھی نے کہا کہ ہم پانچ نیائے (جسٹس) کے عہد کے ساتھ کسانوں، نوجوانوں، مزدوروں، خواتین اور پسماندہ لوگوں کے درمیان جائیں گے اور لوگوں کی زندگیوں سے جڑے حقیقی مسائل پر براہ راست الیکشن لڑیں گے۔

نئی دہلی: کانگریس لیڈر راہل گاندھی نے منگل کو کہا کہ پارٹی کا منشور صرف ایک دستاویز یا گارنٹی نہیں ہے بلکہ اس میں شامل مسائل سماج کے ہر طبقے کی زندگی میں انقلابی تبدیلیاں لانے کی گارنٹی ہے۔

راہل گاندھی نے پارٹی کی اعلیٰ ترین پالیسی بنانے والی باڈی کانگریس ورکنگ کمیٹی کی میٹنگ میں پارٹی کے منشور کو منظوری دے کر پارٹی صدر ملکارجن کھڑگے کے ذریعہ جاری کرنے کے بعد ایک بیان میں کہا کہ کانگریس کا منشور تمام طبقات کے مفادات کی گارنٹی دیتا ہے اور اس کے نافذ ہونے سے ہر طبقے کی زندگیوں میں تبدیلی یقینی ہو گی۔

انہوں نے کہا کہ آج کانگریس ورکنگ کمیٹی کی میٹنگ میں پارٹی کے منشور پر گہرائی سے بات چیت ہوئی جس میں ہمارے پانچ نیائے (جسٹس) اور 25 گارنٹی شامل ہیں۔ بھارت جوڑو یاترا اور بھارت جوڑو نیائے یاترا کے ذریعے، ہم مسلسل گاؤں سے لے کر لوگوں کے درمیان گیے۔

گاؤں گاؤں، گلی گلی اور ملک کی آواز کو سنا، ہم نے لوگوں کے ساتھ ہونے والی ناانصافیوں اور ان کی زندگیوں کی جدوجہد کو قریب سے جانا اور سمجھا۔ یہی وجہ ہے کہ ہمارا منشور اور گارنٹیاں محض دستاویزات نہیں ہیں، کروڑوں ہم وطنوں کے ساتھ ہوئی بات چیت سے نکلا ایک روڈمیپ ہے جو روزگار میں انقلاب اور ہر طبقے کی زندگی بدلنے جارہا ہےہے۔

راہل گاندھی نے مزید کہا کہ "ہم پانچ نیائے (جسٹس) کے عہد کے ساتھ کسانوں، نوجوانوں، مزدوروں، خواتین اور پسماندہ لوگوں کے درمیان جائیں گے اور لوگوں کی زندگیوں سے جڑے حقیقی مسائل پر براہ راست الیکشن لڑیں گے۔ کانگریس کی گارنٹیاں: ہم وطنوں کی زندگیوں میں خوشحالی لانے کا عزم ہے۔"

کانگریس ورکنگ کمیٹی کی میٹنگ کے بعد پارٹی لیڈر سچن پائلٹ نے کہا کہ منشور کو لے کر آج ایک میٹنگ ہوئی۔ ہم نے بہت سے مسائل پر تبادلہ خیال کیا ہے اور ان ضمانتوں (گارنٹی) کو لاگو کیا ہے جن کا ملکارجن کھڑگے اور راہل گاندھی نے بارہا اظہار کیا ہے۔

انہوں نے کہا کہ کانگریس محروم طبقات کے لئے وقف ہے۔ ہم اپنے منشور میں ملک کے حالات کے بارے میں بھی لوگوں کو بتائیں گے۔ ہم آنے والے وقت میں بتائیں گے کہ انڈیا اتحاد جب جیت کر آئے گی تو ہم کس طرح معیشت، کسانوں، بے روزگاروں اور نوجوانوں کے لیے کام کریں گے۔

پارٹی لیڈر جے رام رمیش نے کہا ہے کہ کانگریس نہ صرف منشور جاری کرے گی بلکہ نیائے پترا بھی جاری کرے گی تاکہ لوگ روشن مستقبل دیکھ سکیں۔ اس دوران کانگریس کے جنرل سکریٹری آرگنائزیشن کے سی وینوگوپال نے کہا کہ ہم نے 3 ماہ کے اندر تلنگانہ میں 30,000 سرکاری نوکریاں دی ہیں۔ اسی طرح ہم دیہی نوجوانوں، خواتین اور کسانوں کی پریشانیوں کو دور کرتے ہوئے ملک کے عوام سے وعدے کر رہے ہیں۔

پارٹی نے کہا کہ بھارت جوڑو نیائے یاترا کے دوران، ہم نے نیائے کے 5 ستونوں کے بارے میں بات کی ہے جن کے قیام سے ہمارا ملک مضبوط ہوگا۔ ان پانچ ستونوں میں یووا نیائے، ناری نیائے، کسان نیائے، شرمک نیائے اور بھاگیداری نیائے شامل ہیں۔ پارٹی نے کہا کہ ان 5 ستونوں کے تحت کانگریس پارٹی نے کل 25 گارنٹیاں دی ہیں جو ملک کو بی جے پی کے ناانصافی کے دور سے آزاد کرائیں گی۔ (یو این آئی)