భూమిలో నుంచి ఎగసిపడ్డ మంటలు భయంతో స్థానికుల పరుగు - Large thud sound heard in Basudevpur Basti

ఝార్ఖండ్ ధన్​బాద్​లో భూమిలో నుంచి భారీగా మంటలు ఎగసిపడ్డాయి. సిజువా ప్రాంతంలోని బసుదేవ్​పుర్ బస్తీలో భారీ శబ్దాలతో ఓ గొయ్యిలో నుంచి మంటలు వచ్చాయి. దీంతో ఘటనాస్థలికి వంద మీటర్ల పరిధిలో ఉన్న ప్రజలంతా భయంతో ఆ ప్రాంతాన్ని ఖాళీ చేశారు. కాగా, సమీపంలోనే భారత్ కోకింగ్ కోల్ లిమిటెడ్ అనే కంపెనీ ఓ మైనింగ్ ప్రాజెక్టు చేపడుతోంది. ఈ ఘటన గురించి తెలుసుకొని సంస్థ అధికారులు ఆ ప్రాంతానికి హుటాహుటిన వచ్చి పరిస్థితిని సమీక్షించారు. జేసీబీల సాయంతో ఆ ప్రాంతం గొయ్యిని పూడ్చేసి మంటలను అదుపులోకి తెచ్చారు. అనంతరం ఆ ప్రాంతాన్ని సీల్ చేశారు. ​ పైప్​లైన్ నుంచి గ్యాస్ లీక్ అవ్వడం వల్లే మంటలు చెలరేగినట్లు సమాచారం. అయితే, స్థానికులు మాత్రం ఈ ఘటనపై ఆందోళన వ్యక్తం చేస్తున్నారు. ఇక్కడ తాము భయంతో బిక్కుబిక్కుమంటూ జీవిస్తున్నామని వాపోయారు.