వర్షాకాలంలో పిల్లలకు సీజనల్​ వ్యాధుల ముప్పు.. ఈ జాగ్రత్తలు తప్పనిసరి!!

Child Care During Monsoon : వర్షాకాలంలో పిల్లలు అనారోగ్యం బారిన పడే అవకాశాలు ఎక్కువ. కాబట్టి వారిని జాగ్రత్తగా చూసుకోవాలి. పిల్లలు తినే ఆహారం దగ్గర నుంచి వేసుకునే బట్టల వరకు పలు జాగ్రత్తలు తప్పనిసరి అని ఆరోగ్య నిపుణులు సూచిస్తున్నారు. ఈ సీజన్​లో పిల్లలు ఆరోగ్యంగా ఉండాలంటే ఏం చేయాలో ఇప్పుడు తెలుసుకుందాం.

Child Care During Monsoon : వర్షాకాలంలో వాతావరణం ఒక్కసారిగా మారిపోతుంది. పగలు ఒకరకంగా, రాత్రి ఒకరకంగా ఉండే ఉష్ణోగ్రతలకు తగినట్లుగా పిల్లల విషయంలో పలు జాగ్రత్తలు తీసుకోవాలి. వర్షాకాలంలో దోమల బెడద కూడా అనారోగ్యానికి దారితీస్తుంది. కనుక అప్రమత్తంగా ఉండాలి. ఫ్లూ, జ్వరం, జలుబు లాంటి సమస్యలకు తక్షణ పరిష్కారం చూడగలిగితే పిల్లలు ఆరోగ్యవంతంగా ఉంటారు. ఈ అప్రమత్తతల గురించి ఇప్పుడు వివరంగా తెలుసుకుందాం.

ప్రస్తుతం వర్షాకాలం నడుస్తోంది. చినుకులు పడటమే ఆలస్యం, పిల్లలకు జలుబు, దగ్గు అంటూ రకరకాల సమస్యలు వస్తాయి. పిల్లల్లో రోగనిరోధక శక్తి తక్కువగా ఉండటం వల్ల ఈ వ్యాధులు త్వరగా వారికి వచ్చేస్తాయి. అందుకే పిల్లల ఆరోగ్యం విషయంలో వర్షాకాలంలో ఎక్కువ జాగ్రత్తలు తీసుకోవాలి. తాగునీటిలో రకరకాల బ్యాక్టీరియాలు చేరడం కూడా పిల్లల అనారోగ్యానికి కారణాలు. మరీ ముఖ్యంగా వర్షాకాలం వచ్చిందంటే చాలు.. చిన్నారులపై వైరస్ దాడి మొదలవుతుంది. పిల్లలకు వెచ్చటి బట్టలు వేయడం ద్వారా శరీర ఉష్ణోగ్రతను కాపాడాలి. వర్షాకాలంలో ఎక్కువగా మూత్ర విసర్జన చేస్తుంటారు. కాబట్టి తరచూ డైపర్లు మార్చాలి.

'వర్షాకాలంలో ముఖ్యంగా గాలి, నీరు, ఆహారం, దోమలు, ఈగల ద్వారా చిన్నారులకు వ్యాధులు సోకే అవకాశం ఉంది. గాలి ద్వారా ఫ్లూ వ్యాపిస్తుంది. అదో వైరస్. రోగనిరోధక శక్తి తక్కువగా ఉన్నప్పుడు ఈ ఫ్లూ చిన్నారుల శరీరంలోకి ప్రవేశించి జలుబు, దగ్గు, జ్వరం వచ్చేలా చేస్తుంది. ఇమ్యూనిటీ తక్కువగా ఉండే పిల్లలు.. ముఖ్యంగా ఏడాది కంటే తక్కువ వయసు ఉండే చిన్నారుల్లో ఫ్లూ త్వరగా ప్రవేశిస్తుంది. వర్షాకాలంలో తాగే నీరు కలుషితమయ్యే అవకాశాలు ఎక్కువ. ఇలాంటి కలుషితమైన నీటిని తాగితే చిన్నారులు రోగాల బారిన పడతారు. తినే ఆహారం కలుషితమైనా వ్యాధులు సంక్రమిస్తాయి. జాగ్రత్తగా ఉండాలి' అని ప్రముఖ పీడియాట్రిషియన్ డాక్టర్ శ్రీకాంత్ చెప్పుకొచ్చారు.

కలుషితమైన నీరు, ఆహారం తీసుకుంటే చిన్నారులు కలరా, టైఫాయిడ్ లాంటి రోగాల బారిన పడతారని డాక్టర్ శ్రీకాంత్ తెలిపారు. దోమల ద్వారా వ్యాపించే డెంగ్యూ లాంటి వ్యాధులు జులై నుంచి సెప్టెంబర్ వరకు ప్రజల్ని బాగా ఇబ్బంది పెడతాయని ఆయన పేర్కొన్నారు. డెంగీ తీవ్రమైన వ్యాధి అని.. దీని వల్ల ప్రాణాలు కోల్పోయే ప్రమాదం కూడా ఉందని హెచ్చరించారు. పిల్లలకు ఏ పూటకు ఆ పూట తాజాగా వండిపెట్టడం మంచిదని ఆరోగ్య నిపుణులు సూచిస్తున్నారు. వర్షాకాలంలో ఎక్కువగా దొరికే బొప్పాయి, దానిమ్మ, నేరేడు, యాపిల్ వంటి పండ్లను పిల్లలకు ఎక్కువగా ఇవ్వాలని చెబుతున్నారు.

ఫాస్ట్ ఫుడ్​కు బైబై..
Best Food For Child Monsoon Season : ఫాస్ట్​ ఫుడ్​కు పిల్లలను దూరంగా ఉంచాలి. తాగునీరు కలుషితం కాకుండా చూసుకోవడం సహా ఆర్వో వాటర్ వాడితే మరీ మంచిది. వర్షాకాలంలో రోగనిరోధక శక్తిని పెంచే డ్రైఫ్రూట్స్ వంటి వాటిని ఆహారంలో చేర్చడం మంచి ఫలితాన్ని ఇస్తుంది. వర్షాకాలంలో నీటి ద్వారా సంక్రమించే వ్యాధులు కూడా ఎక్కువే కాబట్టి కాచి చల్లార్చిన నీటినే వాడడం మేలని అంటున్నారు ఆరోగ్య నిపుణులు. వర్షాకాలంలో పిల్లలకు పోషకాహారం పెట్టాలి. అలాగే తాజాగా వండిన ఆహారాన్ని పెట్టాలి. రోజువారి ఆహారంలో ఆకుకూరలు, డ్రైఫ్రూట్స్, నట్స్, పాలు, గుడ్లు ఉండేలా చూసుకోవాలి.

గాలి ద్వారా వచ్చే ఫ్లూ, ఇన్ఫ్లుయెంజా లాంటి వాటిని నిరోధించాలి. ఇంట్లో పెద్దవారికి జలుబు, దగ్గు లక్షణాలు ఉంటే వారిని పిల్లల నుంచి దూరంగా ఉంచాలి. పెద్దవారితో పాటు పిల్లలు కూడా మాస్క్ ధరించేలా చూడాలి. ఒకవేళ పిల్లలకు జలుబు, దగ్గు ఉంటే వారిని స్కూళ్లకు పంపొద్దు. దోమల ద్వారా వ్యాపించే డెంగ్యూ లాంటి రోగాల బారిన పడకుండా ఉండాలంటే దోమ తెరలు వాడటం మంచిది. దోమ తెరలను విరివిగా వాడడం సహా ఇంటి తలుపులకు జాలీల వంటివి పెట్టుకోవాలి.

డైట్ చాలా ముఖ్యం
ఆడుకోవడం సహా రకరకాల పనుల్లో నిమగ్నమయ్యే పిల్లలు ఏది పడితే అది ముట్టుకుంటారు. దీని వల్ల వారి చేతుల్లో బ్యాక్టీరియా, వైరస్​లతో నిండిపోతాయి. అవి సులభంగా దేహంలో చేరే ప్రమాదం ఉండటం వల్ల పిల్లలకు బయటకు వెళ్లి వచ్చిన ప్రతిసారి కాళ్లు, చేతులు శుభ్రంగా కడుక్కోవడం అలవాటు చేయాలి. వర్షాకాలంలో ఎక్కువగా వచ్చే ఫ్లూ సమస్య నుంచి పిల్లలను కాపాడుకోవడానికి టీకాలు ఇప్పించడం కూడా మర్చిపోవద్దు.

పిల్లలకు ఇచ్చే భోజనంలో అన్నం, రొట్టెల లాంటి వాటితో పాటు పండ్లు, ప్రొటీన్ ఎక్కువగా ఉండే పప్పు, నట్స్, మాంసం లాంటివి చేర్చాలి. అలాగే పాల ఉత్పత్తులు కూడా క్రమం తప్పకుండా తీసుకోవాలి. హెల్దీ డైట్ ఇస్తే పిల్లలు అనారోగ్యం బారిన పడకుండా ఉంటారని ఆరోగ్య నిపుణులు సూచిస్తున్నారు.

• ఇవీ చదవండి: