పేద, మధ్య తరగతి ప్రజలపై అధిక భారం మోపే భూ క్రమబద్ధీకరణ స్కీంను తక్షణమే సస్పెండ్ చేయాలని తెలంగాణ జన సమితి రాష్ట్ర అధ్యక్షుడు కోదండరాం డిమాండ్ చేశారు. కరోనా విపత్తు సమయంలో ఎల్ఆర్ఎస్ స్కీం ప్రజల నడ్డి విరుస్తోందని ఆందోళన వ్యక్తం చేశారు. కరోనా సమయంలో ప్రజలు ఉపాధి లేక ఇబ్బందులు పడుతుంటే... ప్రభుత్వం వారిని దోచుకునేందుకు యత్నించడం హేయమన్నారు.
ఆ వర్గాల హక్కులకు రక్షణ...
రెవెన్యూ వ్యవస్థను ప్రక్షాళన చేస్తూనే.. పేద వర్గాల హక్కులకు రక్షణ కల్పించాలని కోదండరాం కోరారు. పేదలకు పట్టా పాస్ పుస్తకం చేతికి వచ్చే వరకు పోరాటం వదిలే ప్రసక్తే లేదన్నారు. తెరాస ప్రభుత్వం అధికారంలోకి వచ్చాక రాజకీయ నాయకుల వల్ల రెవెన్యూ వ్యవస్థ దుర్లబంగా తయారైందని ఎద్దేవా చేశారు. రాజకీయ నాయకుల జోక్యం వల్లే రెవెన్యూ వ్యవస్థ గందరగోళంగా మారిందన్నారు. రెవిన్యూ వ్యవస్థకు ఆ శాఖ ఉద్యోగులను బాధ్యులను చేయడం సమంజసం కాదన్నారు. ప్రభుత్వం తొందరపడి బిల్లు పాస్ చేయకుండా ముందు చర్చ పెట్టాలని సూచించారు. అందరి సూచనలను పరిగణలోకి తీసుకుని ముందుకు వెళ్లాలన్నారు. తెరాస రాజకీయ లాలుచీతనం వల్లే రెవెన్యూ వ్యవస్థ పాడైపోయిందని ఆందోళన వ్యక్తం చేశారు. రాజకీయ నాయకులు విచ్చలవిడిగా రికార్డులను తారుమారు చేశారని ఆగ్రహం వ్యక్తం చేశారు.
వారి పట్టా పుస్తకాలు వచ్చేదాకా పోరాడతాం..