108 అడుగుల అయ్యప్ప విగ్రహానికి భూమిపూజ చేసిన ఎమ్మెల్యే

వనపర్తి జిల్లా కొత్తకోటలో 108 అడుగుల భారీ అయ్యప్ప విగ్రహ ఏర్పాటు కోసం భూమి పూజ నిర్వహించారు. ఈ కార్యక్రమంలో దేవరకద్ర ఎమ్మెల్యే ఆల వెంకటేశ్వర రెడ్డి పాల్గొన్నారు.

వనపర్తి జిల్లా కొత్తకోటలో అయ్యప్ప సేవా సమితి ఆధ్వర్యంలో 108 అడుగుల భారీ అయ్యప్ప విగ్రహాన్ని ఏర్పాటు చేయనున్నారు. దీనికి సంబంధించి ఎమ్మెల్యే ఆల వెంకటేశ్వర రెడ్డి భూమి పూజ నిర్వహించారు. దేశంలోనే ఎక్కడా లేనంత భారీ అయ్యప్ప స్వామి విగ్రహాన్ని కొత్తకోటలో ఏర్పాటు చేస్తున్నట్లు ఎమ్మెల్యే పేర్కొన్నారు. ఇంత పెద్ద విగ్రహ ఏర్పాటుకు భూమి పూజ చేయడం ఆనందంగా ఉందన్నారు.

భవిష్యత్తులో ఈ ప్రదేశం మంచి పర్యాటక ప్రాంతంగా మారుతుందని ఎమ్మెల్యే ఆశాభావం వ్యక్తం చేశారు. వీలైనంత త్వరగా నిర్మాణం పూర్తయ్యేలా చూడాలని సూచించారు. విగ్రహ నిర్మాణానికి తన వంతు సాయం అందిస్తానని తెలిపారు. కార్యక్రమంలో జడ్పీ వైస్ ఛైర్మన్ వామన్ గౌడ్, ఎంపీపీ గుంత మౌనిక, అయ్యప్ప సేవా సమితి సభ్యులు, భక్తులు అధిక సంఖ్యలో పాల్గొన్నారు.

ఇవీచూడండి: "దాడికి దిగారు... తప్పని పరిస్థితుల్లో కాల్చి చంపారు"