ఈ నెల 29న కొండపోచమ్మ జలాశయాన్ని ప్రారంభించనున్న సీఎం

సాగునీటి ప్రాజెక్టుల పునరాకృతిలో భాగంగా రాష్ట్ర ప్రభుత్వం అత్యంత ప్రతిష్ఠాత్మకంగా చేపట్టిన కాళేశ్వరం ఎత్తిపోతల పథకం దశలవారీగా రైతులకు ఫలాలు అందిస్తోంది. సరిగ్గా ఏడాది క్రితం ప్రాజెక్టులో భాగంగా మొదటి పంపు ప్రారంభం కాగా.. ప్రస్తుతం పదో దశ ఎత్తిపోతల ప్రక్రియకు రంగం సిద్ధమైంది. మల్లన్నసాగర్ వరకు గోదావరి జలాలు ఇప్పటికే చేరుకోగా... ఈ నెల 29న కొండపోచమ్మ సాగర్ జలాశయం ప్రారంభం కానుంది.

కాళేశ్వరం ప్రాజెక్టులో భాగంగా అత్యంత ఎత్తైన ప్రాంతంలో నిర్మించిన జలాశయంలోకి త్వరలో గోదావరి నీరు చేరనుంది. సిద్దిపేట జిల్లాలో 15 టీఎంసీల సామర్థ్యంతో సిద్ధమైన కొండపోచమ్మ సాగర్ జలాశయాన్ని ఈ నెల 29న ఉదయం 11.30కు సీఎం కేసీఆర్ ప్రారంభించనున్నారు. త్రిదండి శ్రీమన్నారాయణ చినజీయర్ స్వామి కూడా ప్రారంభోత్సవ కార్యక్రమంలో పాల్గొని ఆశీర్వచనం ఇస్తారు.

15 టీఎంసీల సామర్థ్యంతో నిర్మించిన ఈ జలాశయం ఎఫ్ఆర్ఎల్ 618 మీటర్లు. మేడిగడ్డ ఆనకట్ట ఎగువన కన్నేపల్లి పంప్ హౌస్​ వద్ద 88 మీటర్ల ఎఫ్ఆర్ఎల్ నుంచి నీటిని ఎత్తిపోస్తున్నారు. ఇప్పటికే అక్కారం పంప్ హౌస్ నుంచి గోదావరి జలాలు మార్కూక్ పంప్ హౌస్​కు చేరాయి. మార్కూక్​లో సీఎం మోటార్లను ప్రారంభిస్తే నేరుగా కొండపోచమ్మ సాగర్ జలాశయంలోకి గోదావరి జలాలు వెళ్తాయి. దీంతో పదో దశ ఎత్తిపోతల పూర్తవుతుంది. ప్రాజెక్టులో చివరి ఎత్తిపోతల కూడా ఇదే.

రెండు లక్షల 85 వేల ఎకరాల ఆయకట్టు...

ఇప్పటికే దశల వారీగా జలాలు అన్నారం, సుందిళ్ల, ఎల్లంపల్లి, నందిమేడారం, గాయత్రి, మధ్యమానేరు, అనంతగిరి, రంగనాయక్ సాగర్, మల్లన్నసాగర్ వరకు చేరాయి. మిగతా జలాశయాలు, కాల్వలకు ఇక్కణ్నుంచి నీరు గురుత్వాకర్షణ ద్వారానే వెళ్తుంది. కొండపోచమ్మ సాగర్ జలాశయం కింద రెండు లక్షల 85 వేల ఎకరాల ఆయకట్టు ప్రతిపాదించారు. కాల్వల ద్వారా చెరువులు నింపుతారు. హైదరాబాద్ తాగునీటి అవసరాల కోసం నిర్మించనున్న కేశవాపూర్ జలాశయానికి కూడా కొండపోచమ్మసాగర్ నుంచే జలాలు వెళ్తాయి.