వైద్య రంగంలో కేంద్ర నిర్ణయంపై ఐఎంఏ నిరసన

నిర్మల్​ జిల్లా కేంద్రంలో పలువురు వైద్యులు నిరసన ప్రదర్శన చేపట్టారు. ఆయుర్వేద వైద్యులకు శస్త్ర చికిత్సలు చేసేందుకు అవకాశం కల్పిస్తూ ఆయుష్​ మంత్రిత్వ శాఖ తీసుకున్న నిర్ణయానికి వ్యతిరేకిస్తూ ప్లకార్డులు ప్రదర్శించారు. ఈ నిర్ణయంపై కేంద్రం మరోసారి ఆలోచించుకోవాలని సూచించారు.

ఆయుర్వేద వైద్యులకు శస్త్ర చికిత్సలు చేసేందుకు అవకాశం కల్పిస్తూ కేంద్రం తీసుకున్న నిర్ణయంపై ఐఎంఏ ఆగ్రహం వ్యక్తం చేసింది. ఈ మేరకు నిర్మల్ జిల్లా కేంద్రంలో మంగళవారం నిరసన ప్రదర్శన చేపట్టారు. కేంద్ర ప్రభుత్వానికి వ్యతిరేకంగా ప్లకార్డులు ప్రదర్శించారు.

యునాని, ఆయుర్వేదం, హోమియోపతి లాంటి దేశీయ వైద్య చికిత్స విధానాలను పరిశోధనలతో అభివృద్ధి చేయాలని ఐఎంఏ రాష్ట్ర కౌన్సిల్​ సభ్యుడు అప్పాల చక్రదారి పేర్కొన్నారు. ఆయా వైద్య చికిత్స విధానాలు వేటికవే వైరుధ్యంతో కూడుకున్నవని తెలిపారు. అవేమీ పట్టించుకోకుండా అన్నింటినీ కలపటం వల్ల ప్రజారోగ్యం ప్రమాదంలో పడుతుందన్నారు. కార్యక్రమంలో రామకృష్ణ, కృష్ణంరాజు, రమేశ్, మురళీధర్, కృష్ణమోహన్, రవికుమార్, శ్రీనివాస్ తదితరులు పాల్గొన్నారు.