పెద్దపులి కదలికలపై పరిశీలనలు.. నిరంతరం అప్రమత్తం!

బెబ్బులి పులి గర్జించే ప్రాంతమది.. ఒక్కరుగా వెళ్లడానికి ఎవరూ సాహసం చేయరు.. సూర్యుడి కిరణాలు నేలకు చేరకుండా చేసే ఎత్తైన వృక్షాలు, చీమ చిటుక్కుమన్నా వినిపించేంత నిశ్శబ్దం.. దీన్ని భగ్నం చేస్తూ అప్పుడప్పుడు పక్షుల కిలకిలా రావాలు. ఈ ప్రదేశమే పులులకు ఆవాసం. అలాంటి అడవిలోకి సాహసం చేసి వెళ్లారు. అనుకున్న పని నెరవేర్చి వచ్చారు ఈ టైగర్​ ట్రాకర్లు.

కుమురం భీం జిల్లాలో పెద్దపులి దాడులు అధికమవుతున్న నేపథ్యంలో అటవీ శాఖ అధికారులు నిరంతరం అప్రమత్తంగా ఉంటూ పులి కదలికల్ని గమనిస్తున్నారు. ఈ నేపథ్యంలో కొందరు అటవీశాఖ అధికారులు అడవిలోకి వెళ్లి అక్కడి పరిసరాలను గమనించారు.

డీపీవో శాంతారాం, ఎఫ్​ఆర్వో వేణుగోపాల్, ఎఫ్​ఎస్వో ప్రభాకర్​, మరో 5గురు టైగర్ ట్రాకర్​లు.. పెంచికల్​పేట మండలం నుంచి 10 కిలోమీటర్లు ప్రయాణించి గుండెపల్లి అడవుల్లోకి సోమవారం ఉదయం 8 గంటలకు చేరుకున్నారు. కర్రలు పట్టుకుని అడవిలోకి ప్రవేశించి అక్కడ ఏర్పాటు చేసిన కెమెరాల్లో చిప్​ను మార్చారు.

అడవిలో పులి అడుగులకై అధికారులు, పోలీసుల పరిశీలన

అమ్మో.. పెద్దపులి పాద ముద్రలు

అనంతరం పులులు, ఇతర వన్య ప్రాణులకు ఉన్న తాగునీటి వనరులను పరిశీలించారు. వన్యప్రాణులను పట్టుకోవడానికి వేటగాళ్లు ఏమైనా ఉచ్చులు పెట్టారా అని తనిఖీ చేసారు. పులి పాదముద్రలను చూసి, వాటికి అనుగుణంగా పరిసర గ్రామాల్లో ఉన్న అటవీ అధికారులను అప్రమత్తం చేశారు.

ఇదీ చదవండి:పచ్చిపాలతో ప్రమాదం.. బ్రసెల్లోసిస్ వ్యాధి వచ్చే అవకాశం!