మూడో సంతానం కూడా అమ్మాయి కావడంతో దంపతులిద్దరూ భారమని భావించారు. శిశువును సర్కారు ఆసుపత్రి ‘ఊయల’లో వదిలేసి ఇంటికెళ్లిపోయారు. కానీ పేగు బంధాన్ని తెంచుకోలేక మనసు మార్చుకుని గంటల వ్యవధిలో ఆమె భర్తను ఆసుపత్రికి పంపింది. ఇందుకు సంబంధించిన వివరాలు ఈ విధంగా ఉన్నాయి. సూర్యాపేట జిల్లా మోతె మండలం గోపతండాకు చెందిన ఓ ఆటో డ్రైవర్‌ డిసెంబరు 23న భార్యను కాన్పు కోసం ఖమ్మం ప్రభుత్వ ఆసుపత్రిలో చేర్పించాడు.
అదేరోజు వైద్యులు సిజేరియన్‌ చేశారు. ఆడపిల్ల జన్మించడంతో వారు భారమని భావించారు. పుట్టిన శిశువు వద్దనుకునే తల్లిదండ్రుల కోసం ఆసుపత్రిలో ప్రభుత్వం ఏర్పాటు చేసిన ఊయలలో బిడ్డను వదిలేసి శనివారం మధ్యాహ్నం ఇంటికెళ్లిపోయారు. గంటల వ్యవధిలోనే తల్లి మనసు మారింది. భర్తను ఆసుపత్రికెళ్లి శిశువును తీసుకురమ్మని చెప్పింది. అతడు ఆసుపత్రికి వెళ్లి ఊయలలో వదిలివెళ్లిన పాప తమ బిడ్డే అని చెప్పాడు.