వంట గ్యాస్ ధరలు భగ్గుమన్నాయి. డిసెంబరులో రెండోసారి చమురు సంస్థలు సిలిండర్ ధరను పెంచాయి. ఈ నెల 2వ తేదీన గృహావసరాలకు వినియోగించే 14.2 కిలోల సిలిండరు ధరను రూ.40 పెంచగా.. తాజాగా మంగళవారం రాత్రి మరో రూ.60 పెంచారు. దీంతో ఈ నెలలో మొత్తం రూ.వంద పెరిగి రూ.746.50కు చేరింది.
రెండు వారాల్లో వంట గ్యాస్ సిలిండర్ ధరను ఇంతలా పెంచిన దాఖలాలు ఎప్పుడూ లేవని వ్యాపారులు చెబుతున్నారు. సహజంగా ధరల నిర్ణయ సమయంలోనే రాయితీ ఎంత అన్నది కేంద్ర ప్రభుత్వం ప్రకటించి.. నగదు బదిలీ రూపంలో వినియోగదారుడి ఖాతాలో జమ చేస్తుంది. ఈ నెలలో రెండు దఫాలు ధర పెంచినా రాయితీపై ప్రకటన లేకపోవటం చర్చనీయాంశంగా మారింది. అలానే ఈ నెల 2 నుంచి సిలిండర్లు డెలివరీ తీసుకున్న వారికి రాయితీ సొమ్ము పూర్తిస్థాయిలో జమ కావడం లేదు. ఏడాదిలో 12 సిలిండర్లు తీసుకున్న వారికి మాత్రమే రాయితీ లభిస్తుంది. అంతకుమించి తీసుకునే సిలిండర్లకు మొత్తం ధరను భరించాల్సిందే.