పాల అమ్మకాలపై లాక్‌డౌన్‌ ప్రభావం

లాక్‌డౌన్ ఆంక్షలతో దేశవ్యాప్తంగా పాలకు గిరాకీ తగ్గింది. ఎలాంటి సామూహిక కార్యక్రమాలు లేకపోవడం వల్ల డిమాండ్ తగ్గి అమ్మకాలు పడిపోయినా రాష్ట్రంలో మాత్రం పాల కొరత వేధిస్తోంది. క్షేత్రస్థాయిలో రైతులకు నష్టం వాటిల్లకుండా సేకరించి.. విజయ డెయిరీ ద్వారా పాలు, పాల ఉత్పత్తులు వినియోగదారులకు సరఫరా చేస్తున్నా కొరత తీరట్లేదు.

కరోనా కట్టడి, లాక్‌డౌన్‌ ఆంక్షలతో దేశవ్యాప్తంగా పాలవిక్రయాలు పడిపోయాయి. హోటళ్లు, వివాహాది, శుభకార్యాలు, సామూహిక భోజనాలు లేకపోవడంతో దేశవ్యాప్తంగా కోటి లీటర్ల పాలు మిగిలిపోతున్నాయి. ఫిబ్రవరిలో తీవ్రకొరత ఉండగా లాక్‌డౌన్‌తో ఒక్కసారిగా పరిస్థితులు తారుమారయ్యాయి. పలు రాష్ట్రాల్లో డెయిరీలు మిగిలిపోతున్న పాలతో....పొడి తయారు చేసి నిల్వచేస్తున్నట్లు జాతీయ పాడి పరిశ్రమాభివృద్ధి మండలి-ఎన్డీడీబీ వెల్లడించింది.

రోజుకు సగటున సుమారు 5.08 కోట్ల లీటర్లను... దేశవ్యాప్తంగా సహకార డెయిరీలు సేకరిస్తున్నాయి. లాక్‌డౌన్ ప్రారంభానికి ముందు దేశంలో 70 వేల టన్నులుగా ఉన్న పాల పొడి నిల్వలు.. ఏప్రిల్ వరకు లక్షా 34వేల టన్నులకు పెరిగాయి. ఈ నెలాఖరు నాటికి... 2 లక్షల టన్నులు దాటిపోవచ్చని అంచనా. పాలపొడి ధర కిలో 350 నుంచి 250కు పడిపోయిందని ఎన్డీడీబీ తెలిపింది. ఐతే పాల ఉత్పత్తులైన వెన్న, నెయ్యి, పన్నీరు వంటి అమ్మకాలు మాత్రం పెరిగాయని వెల్లడించింది.

దేశంలోని ఇతర రాష్ట్రాలకు భిన్నంగా తెలంగాణను మాత్రం ఇప్పటికీ పాల కొరత తీవ్రంగా వేధిస్తోంది. లాక్‌డౌన్‌కు ముందే... ఫిబ్రవరి నుంచి పాల కొరత ఏర్పడింది. ప్రస్తుతం రాష్ట్రంలో పాలు దొరక్క రాష్ట్ర పాడి పరిశ్రామిభివృద్ధి సమాఖ్య - విజయ డెయిరీ..... ఆంధప్రదేశ్‌, మహారాష్ట్ర నుంచి రోజు లక్షల లీటర్లు కొనుగోలు చేస్తోంది. విజయ డెయిరీ రోజూ మూడున్నర లక్షల లీటర్ల పాలు విక్రయిస్తోంది. రెండున్నర లక్షల లీటర్లు రైతుల నుంచి వస్తుండగా..మిగిలిన మొత్తాన్ని ఇతర రాష్ట్రాల నుంచి కొనుగోలు చేస్తున్నట్లు ఆ సంస్థ ఎండీ శ్రీనివాసరావు తెలిపారు.

వేసవి కారణంగా పశువుల్లో పాల ఉత్పత్తి తగ్గడం, పచ్చిమేత కొరవడటం, పశువుల నిర్వహణ సైతం సరిగా లేకపోవడమే.. పాల కొరత కారణమని డెయిరీ వర్గాలు పేర్కొన్నాయి.

ఇవీ చూడండి:మద్యం సేవిస్తే.. కరోనా సోకే అవకాశాలు ఎక్కువ!