Telangana Fire Department News : ఎన్డీఆర్ఎఫ్ తరహాలో సేవలు అందించడానికి అగ్నిమాపక శాఖ సిద్ధమవుతుంది. ఎస్డీఆర్ఎఫ్ విభాగం ఏర్పాటుకు ప్రభుత్వానికి ప్రతిపాదనలు పంపించినట్లు అగ్నిమాపక డీజీ నాగిరెడ్డి తెలిపారు. ప్రమాదవశాత్తు ఎవరైనా నీటిలో పడిపోతే ఏవిధంగా వారిని రక్షించాలో.. హైదరాబాద్ హుస్సేన్ సాగర్ తీరంలో అవగాహన సదస్సు ఏర్పాటు చేశారు. ఈ కార్యక్రమానికి రాష్ట్ర హోంశాఖ సెక్రటరీ డాక్టర్ జితేందర్, సీనియర్ ఐఏఎస్ అధికారి రాహుల్ బొజ్జ, అగ్నిమాపక డిజీ నాగిరెడ్డి తదితరులు హాజరయ్యారు.
Telangana Disaster Response Force :ఎలాంటి ఆపదలోనైనా రెస్క్యూ చేయడంలో తాము ముందంజలో ఉన్నామని అగ్నిమాపక శాఖ డీజీ నాగిరెడ్డి అన్నారు. ప్రకృతి విపత్తులను ఎదుర్కునేందుకు సిద్ధంగా ఉన్నామని స్పష్టం చేశారు. నీటిలో పడిపోయిన వాళ్లను సిబ్బంది ఎలా కాపాడాలనే అంశంపై అధికారులు... హుస్సేన్‌సాగర్‌ తీరంలోఅవగాహన సదస్సు ఏర్పాటు చేశారు. వర్షాకాలం ఎక్కడైనా వరదలు సంభవిస్తే వాటికోసం 20 పడవలను సిద్ధంగా ఉంచామని తెలిపారు.
వరదల సమయంలో ఆపదలో ఉన్న వారిని ఎలా రక్షించాలనే అంశాలపై.. పుణేకు చెందిన ఇండియన్ రెస్క్యూ అకాడమీతో శిక్షణ ఇప్పించారు. ఈ శిక్షణలో 149మంది పాల్గొన్నారు. హైదరాబాద్, రంగారెడ్డి జిల్లాల్లో 64 మంది శిక్షణ పూర్తి చేశారు. ప్రమాద సమయాల్లో ప్రజల ప్రాణాలను ఎలా కాపాడాలో.. సాంకేతికతను ఉపయోగించి శిక్షణ పూర్తి చేశామని సిబ్బంది వెల్లడించారు. ఏదైనా ప్రమాదం జరిగితే బాధితుల్ని రక్షించడానికి పోరాడుతామన్నారు. దాదాపు మూడు సంవత్సరాలుగా అధికారులు ఇస్తున్న శిక్షణ తీసుకుంటున్నామని వివరించారు. ఎన్డీఆర్ఎఫ్ తరహాలో ఎస్డీఆర్ఎఫ్ విభాగం ఏర్పాటుకు ప్రభుత్వానికి ప్రతిపాదనలు పంపించామని డీజీ నాగిరెడ్డి వెల్లడించారు.