గిన్నిస్ రికార్డుల్లో హైదరాబాద్ ఉంగరం

ఓకే ఉంగరాన్ని అత్యధిక వజ్రాలతో తయారు చేసిన గిన్నిస్ వరల్డ్ రికార్డుకు భాగ్యనగరం వేదికైంది. హైదరాబాద్​కు చెందిన 'ది డైమండ్ స్టోర్' యజమాని కొట్టి శ్రీకాంత్ ఈ ఘనతను సాధించాడు. 'ది డివైన్​-7801' బ్రహ్మ వజ్ర కమలం పేరుతో ఉంగరాన్ని తయారు చేశామని ఆయన తెలిపారు.

భాగ్యనగరం సిగలో మరో రికార్డు వచ్చి చేరింది. అద్భుతాలకు ఆనవాలుగా నిలిచే హైదరాబాద్​ మరో గిన్నిస్ రికార్డుకు వేదికగా నిలిచింది. జూబ్లీహిల్స్​లోని ది డైమండ్ స్టోర్ యజమాని కొట్టి శ్రీకాంత్ ప్రపంచంలోనే అత్యధిక వజ్రాలతో ఉంగరాన్ని తయారు చేశారు. దీనికి 'మోస్ట్ డైమండ్స్ ఇన్​ ఎ రింగ్' వరల్డ్ గిన్నిస్ అవార్డు దక్కింది. గతంలో ముంబయికి చెందిన ఓ వ్యాపారి 7,777 వజ్రాలతో రూపొందించిన రికార్డును అధిగమించింది.

ఒకే ఉంగరంలో 7801 వజ్రాలను పొదిగించడం ఈ రికార్డు సాధ్యమైందని శ్రీకాంత్ అన్నారు. ఈ ఉంగరాన్ని 'ది డివైన్-7801' బ్రహ్మ కమలంగా నామకరణం చేశామని ఆయన తెలిపారు. ఇందులో ఆరు పూలరేకులు, ఐదు వరుసలలో ఎనిమిది రేకులు, మూడు పుప్పొడి రేణువులతో రూపొందించామన్నారు. ఈ ఉంగరం తయారు చేసేందుకు 11 నెలల సమయం పట్టిందన్నారు. తమ స్టోర్​కు అంతర్జాతీయ స్థాయిలో గుర్తింపు రావడం సంతోషంగా ఉందని తెలిపారు. నవంబర్ నెలలో వేలం నిర్వహించి, ఉంగరాన్ని విక్రయిస్తామని సంస్థ నిర్వాహకులు చందుభాయ్, శ్రీకాంత్ వెల్లడించారు.

ఇదీ చదవండి:కరోనా డ్రగ్ ఛాలెంజ్ విజేతకు వెంకయ్య అభినందన