'రాష్ట్రానికి వెలుగులు పంచిన ఘనత కేసీఆర్​దే'

పురపాలక, ఇంధన, నీటిపారుదల, రహదార్లు-భవనాల శాఖల పద్దులకు ఇవాళ శాసనసభ ఆమోదం తెలిపింది. పురపాలక శాఖలో సంస్కరణలు తీసుకొచ్చామని... కొత్త మున్సిపాలిటీల్లోనూ వసతులు కల్పిస్తామని ప్రభుత్వం తెలిపింది. దాదాపు 13 లక్షల కొత్త ఆయకట్టుకు నీరిచ్చామన్న సర్కార్... ప్రాజెక్టుల నిర్మాణంలో దేశానికే ఆదర్శంగా నిలిచామని స్పష్టం చేసింది. పనులు కొనసాగుతున్న అన్ని ప్రాజెక్టులను త్వరితగతిన పూర్తి చేస్తామని స్పష్టం చేసింది.

బడ్జెట్​పై రెండో రోజు చర్చలో భాగంగా ఇవాళ నాలుగు పద్దులపై చర్చ జరిగింది. పురపాలక, ఇంధన, రహదార్లు-భవనాలు, నీటిపారుదల శాఖల పద్దులను మంత్రులు సభలో ప్రవేశపెట్టిన అనంతరం చర్చ ప్రారంభించారు. జీహెచ్ఎంసీ పరిధిలో మౌలిక వసతులు మెరుగుపరచాలని, రహదార్లు అభివృద్ధి చేయాలని మజ్లిస్ సభ్యుడు కౌసర్ కోరారు. నీటిపారుదల ప్రాజెక్టులు యుద్ధప్రాతిదికన పూర్తి చేస్తూ కేసీఆర్... దేశానికే ఆదర్శంగా నిలిచారని బాల్క సుమన్ అన్నారు. ఉద్యమ నాయకుడు కేసీఆర్ ముఖ్యమంత్రి అయితే తాము సంతోషించామన్న కోమటిరెడ్డి రాజగోపాల్ రెడ్డి... బడ్జెట్​ను చూస్తే నిరుత్సాహం కలిగిందని అన్నారు. కాళేశ్వరం ప్రాజెక్ట్​ను పర్యాటక ప్రాంతంగా మార్చారని ఆక్షేపించారు. ఇష్టం ఉన్న ప్రాజెక్టులనే చేపడుతున్నారని... నల్గొండ ప్రజలు ఏం పాపం చేశారని ప్రశ్నించారు. సమాధానమిచ్చిన మంత్రులు... రాజగోపాల్ రెడ్డి ఆరోపణలను తోసిపుచ్చారు.

మెట్రో రైలును శంషాబాద్​ విమానాశ్రయం వరకు విస్తరిస్తాం:

పురపాలక శాఖలో ఎన్నో సంస్కరణలు తీసుకొచ్చామన్న మంత్రి కేటీఆర్... కొత్త మున్సిపాలిటీల్లో వసతుల కల్పనపై దృష్టి సారించినట్లు తెలిపారు. భాగ్యనగరంలో రోడ్ల మెరుగుదలకు రూ.2300 కోట్లు, పారిశుద్ధ్యం కోసం రూ.800 కోట్లకు పైగా ఖర్చు చేస్తామని కేటీఆర్ వివరించారు. మూసీ సుందరీకరణ హామీకి తాము కట్టుబడి ఉన్నామని పేర్కొన్నారు. కాళేశ్వరం పూర్తితో నగరవాసులకు శాశ్వతంగా తాగునీటి సమస్యకు పరిష్కారం చూపామని చెప్పారు. మెట్రో రైలును శంషాబాద్​ విమానాశ్రయం వరకు విస్తరిస్తామని చెప్పారు

రహదార్ల విషయంలో 50 ఏళ్లలో చేయనిది ఐదేళ్లలో చేశామన్న మంత్రి ప్రశాంత్ రెడ్డి... రహదార్లకు రూ.12,405కోట్లు, భవనాలకు రూ.598 కోట్లు ఖర్చు చేసినట్లు చెప్పారు. చీకట్లను అధిగమించి రాష్ట్రానికి వెలుగులు పంచిన ఘనత ముఖ్యమంత్రి కేసీఆర్​కే దక్కిందని విద్యుత్ శాఖ మంత్రి జగదీష్​ రెడ్డి తెలిపారు.​ వ్యవసాయానికి 24 గంటల ఉచిత విద్యుత్ ఇస్తున్నామని... కాళేశ్వరం సహా ఎత్తిపోతల పథకాలకు అవసరమైన విద్యుత్​ను సమకూర్చుకున్నామని తెలిపారు.

వలసలు వెళ్లినవాళ్లు వాపస్ వచ్చేలా చేసిన చరిత్ర తెరాసది:

నీటిపారుదల శాఖ పద్దుకు ముఖ్యమంత్రి తరఫున ఆర్థిక శాఖ మంత్రి హరీశ్​ రావు సమాధానమిచ్చారు. నీటిపారుదల ప్రాజెక్టుల నిర్మాణంలో తెలంగాణ దేశానికే మార్గం చూపిందని... వలసలు వాపస్ వచ్చేలా చేసిన చరిత్ర తెరాసదేనని అన్నారు. మనగడ్డ మీద మన నీళ్లను ప్రజలు చూడటానికి పోతోంటే కాంగ్రెస్ నేతలకు కన్నీళ్లు వస్తున్నాయన్న మంత్రి... రేపు కాల్వల ద్వారా నీళ్లు వస్తే కాంగ్రెస్​ అడ్రస్ గల్లంతవుతుందని వ్యాఖ్యానించారు.

చర్చ, సమాధానం అనంతరం పద్దులు సభ ఆమోదం పొందాయి. మంత్రి ఎర్రబెల్లి దయాకర్​ రావు అందుబాటులో లేకపోవడం వల్ల పంచాయతీరాజ్ పద్దును తీసుకోలేదు. అనంతరం సభ రేపటికి వాయిదా పడింది.

ఇవీ చూడండి:'తెలంగాణకు కల్వకుంట్ల కుటుంబం నుంచి విముక్తి కల్పిస్తాం'